NUG hmakhua a ong vivo, ITUC in Myanmar ukhruai tuding Cozah dik ah a pom fel zo

Dothlennak Lam tluang dingin le Ralkap ukhruainak malh fai dingah Myanmar rampi in atufang a mamawh bikmi pakhat cu Leitlun ramtinkim le international level pawlkom tumzet pawl in NUG (National Unity Government) hi Myanmar cozah dik ih an cohlang ding hi a si.

NUG (National Unity Government) cu Myanmar mipi cozahdik dinhmun in 2021, April 16 ah CRPH in a dinsuahmi a si ih, atuah international level a si mi ITUC (International Trade Union Confederation) cun Myanmar mipi` ukhruaitu cozahdik dinhmun ah a pom fel thu a phuang a si.

ITUC General Secretary Sharan Burrow cun “NUG cu 2020 election ih mipi` hriltlinmi nehnak cotu`i hmuihmelcuang a si ih Myanmar rampi ukhruai tuding cozahdik a si. Myanmar cozah dik a sinak cu kan nih ITUC khalin kan cohlang ih leitlunhuap pawlkom dangdang khalin cohlangve dingah kan duhsak fawn” a ti.

SAC ralkap cozah khal nasaten a soisel ih “Myanmar mipi that rerotu SAC ralkap cozah cu hnong rori ding an si. Ramdang cozah in SAC ralkap cozah pehzom nak ding san a um lo ih an mah thawn pehpar mi pursumnak lam khal a tawhram rorin chat ṭheh ding a si”.

“Cutivekih hmalaknak an neilo a si cun zalennak sual rerotu mipi a rualrual ih an that rero mi kha an lungkimpi tinak a si” a ti.

ITUC pawlkom cu Myanmar cozah thar National Unity Government dinsuah a si hnu, Myanmar cozah dik ih cohlang hmasabiktu Leitlunhuap pawlkom tum pakhat a si.

ITUC (International Trade Union Confederation) cu leitlunhuap “trade union federation” pawlkom tumbik a si ih pawlkom sungtel ram 163 ihsin member 207 million neitu a si.

An ṭuan bikmi cu pawlkom zawngin leitlun huap “worker rights” hrang hmalaknak neitu an si ih Brussels, Belgium ih hrambun an si.

Leave a Reply

Your email address will not be published. Required fields are marked *