Nikhat lawngah PDF 31 an thi ṭum Doawknak rapthlak

Nikhat sung lawngah Debayin (ဒီပဲယင်း) peng ah PDF le SAC ralhraang voi 3 rori an kapaw ih doawknak ah Phunsang tlawng kailai 6 telin mipi humtu PDF ralkap 31 an thi.

SAC ralhraang lam ah hliamtuar tamzet le mithi 11 hrawng an um ve.

July 2, zinglam nazi 7 hrawngah Sagaing ramṭhen, Debayin (ဒီပဲယင်း) peng, Satpyarkyin khua kiangah SAC ralhraang thazang 200 hrawng le meithal ṭhiṭha neilo PDF pawl an kapaw thok.

Zinglam Doawknak

Zingpit ih an doaw thok dan hi boruak thlirtu pawl cun Dalan pawl ruangah a si tiah an rel.

Raldonak ih telvetu PDF mino pakhat khalin Dalan pawl ih khihhmuhnak ruangah ralhraang pawl in an umnak hmun an thei suak mi siding a zum thu a rel ve.

Amahcun “Khuasung ah ralhraang thazang tamzet an ra lut ih kan dinhmun kan thei ruangah hmun dang ah kan kian.”

“Kan kian nak hmun kan thleng fang ah ralhraang pawl cun khawidanghman pial loin in ra pan cih. Dalan khihhmuhnak ruangah kan umnak an thei siding tiah kan ruat” a ti.

Zingpit in an kapaw ih ralhraang lam cun RPG le meithaltum dangdang hmangin nasaten an kap ih PDF pawl cun mahte tuah cawp hriamhrei ralthuam hmangin an humkhamaw.

Doawknak cu minute 30 hrawng a awh ih cumi sungah ralhraang 4 an thi ih hliam tuar khal an um. PDF lam ah cu khuami 1 telin PDF 8 in hriam an tuar.

Sun Doawknak ah mithi an tam

Zianglam doawknak ih PDF hriamtuar ṭhenkhat tangtami runsuak dingin Sun nazi 12 hrawngah PDF in hmai an nor sal.

Ralhraang pawl cu zinglam doawknak hmun ah umhmun an rak khuar ih timlamnak nei ve in cerek tamzet khal an rak cah bet sal zo.

“Zinglam doawknak ih hriam tuar kan ralkappi ṭhenkhat cu hruai remcang loin hrambur tivek ah kan thup ta. Cupawlcu ralhraang pawl in an rak hawl nasa ih hmun le hmun rori ah mi 6 hrawng an kap that.”

“Sun nazi 12 hrawngah thazang neih sun suah in ralhraang pawl kan va do sal. Nan, tuahcawp meithal le ralram ih hmanmi meithal cu a thlauaw tuk. Kan nih lam ih meithal ṭhabik cu Lai meithal zuunphir lawng a si. Cukhalcu voikhat hmetpuak dingah caan reizet timlam ta a ṭul. Cuvek dinhmun kan si ruangah voihnih doawknak ah kan lam ah mithi an tam” tiah Raldonak ih telvetu PDF mino cu a ti.

Meithal ralthuam hmanmi a thlauaw tikah PDF lam cu dung an siip sal ih ralhraang pawl ih kah thatmi an ralkappi miruak pawl khal an la man lo.

July 3 ih miruak va sar saltu mipakhat cun “mino tamzet cu an Lu ah an kap ngah. Taksadang ih hriampu tla an um” a ti.

Doawknak ih nunnak liam PDF mino ṭhenkhat

Hriamtuar cingin luatsuaktu PDF mino relmi

SAC ralhraang pawl cun dungsiipsaltu PDF ralkap pawl dawi sal in voithumnak an kap. Kapawknak kiangkap hramlak khal an hruatfai thluh.

Hriamtuar tlan theilo kapthatmi khal an um nan ralhraang kut ihsin luatsuaktu khal an um ve.

Cupawl lakih telvetu kum 22 mi PDF mino pakhat cun “zinglam doawknak ah meithaltum hriam ka tuar. Tu ahcu cerek pawl kan phorh suak zo. Asinan, kan relh laifang a si tikah duhvekin kan tuamhlawm thei lo. Keimah rual in mipahnih khal an Ke ah hriam an tuar” a ti.

Amahcu Math major thawn kumthumnak Phunsang Tlawngkailai a si ih hriam tuar a rual le pahnih cu phun 10 ong pekte an si.

“Kan rampi hivek dinhmun ih um ringring ding ka siang lo. Curuangah kan hmalam ziin cu kan mah rori`n kan sial ṭul timi ruahnak thawn himi lamziin ka zawh hi a si” ti`n Phunsang Tlawngtapa cun a sim bet hrih ih “atufang kan ṭulbikmi cu meithal hi a si. Tutiangah Lai meithal lawng hman ding kan nei lai. An nih lam cun meithaltum hmangin tohmun in in kap men. In kap hnu ah hriam tuar tlan theilo pawl an hawl ih hmun le hmun rorin an kap that. Curuangah in bawm duh cun meithal in tawlrel sak zang uh” tiah NUG hnen ih bawmnak a beisei thu a rel cih.

Khua 12 mipi cu Ralkian in hramlak ah an beu

July 2 doawknak ah PDF lam mithi 30 luan an um tiah theih a si ih, Ralhraang pawl in doawknak a tawp hnu khalah khuasung ah meithal an kap ciamco ruangah Khua uksuh 3 (Khua 12) ih mipi pawl cu hramlak ah an beu.

Hramlak ih beutu khuami pakhat cun “July 2 zaan ah khan ralhraang pawl in hmunram an cek vivo ih meithal hmetpuak in mipi an ṭhih phah vivo ruangah khuami tamzet cu ruahsur lakah beunak hawl in Inn le Lo kan suah san. Mi an kai vivo ih upa nauhak tiloin harsatnak kan tong. Atu khalah ei-in ding ṭhiṭha kan nei lo” tiah Mizzima hnen ah a sim ih “Ei-in ding le Siivai bom kan ṭul” a ti.

Leave a Reply

Your email address will not be published. Required fields are marked *