Nikhat sung lawng ih kaihmi 500 an kim zik ih Chin mino 20 hrawng tel ve

February 27 : Ralkap uknak dodal in lamzawh duhphorhnak nei ruangih kaihkhihtuar minung 479 an um tiah MRTV in a phuang.

February 27, Zarhte ni nikhat sung lawng ih kaihmi an si ih kaihkhihtuar nunau 183 telin minung 479 kaihkhih an si.

Yangon (166), Monywa (173) Mandalay (92) khua pawl ah palik le ralkap i kaihkhihtuar an tambik ih “kaihtuar lakah hotu lam deuh kan hawlsuak ding ih hremnak kan pe ding” tikhalin TV ah an phuang a si.

TV ih an phuang mi ahcun “khua 13 ih lamzawh duhphorhnak neitu mibur cu Flash bang (bomb cikhat) hmangin palik le ralkap in an ṭhekdarh ṭheh” ti`n official in an sim nan, hmun ṭhenkhat ahcun ralkap le palik in mibur ṭhek nakah meithal an kap puak ih hliamhma tuartu khal an um tiah ramsung media ṭhenkhat cun an tarlang.

Yangon ih kaihtuar lamzawh duhphorhnak neitu pawl cu thawngtlak mawṭaw 10 hnak ih tam thawn an phur ih Insein Thawnginn lam ah an kuat tiah BBC in a tarlang.

Yangon ah miphun tinkim komkhawm ih lamzawh duhphorhnak neitu lakin Chin mino 20 hrang khal kaihkhih an tuar tiah theih a si ih an nih pawl cu Insein Thawnginn kuat ah an tel maw tello ti theihfel a si lo.

Leave a Reply

Your email address will not be published. Required fields are marked *