Ni 3 sungah Covid 19 ruang ih MiThi 82 um nak san Sim Fiang

September 26-28 karlak, ni 3 sungah Covid 19 mina 82 an thi ih hih thu thawn pehpar in Yangon General Hospital ih Emergency Department lubik Dr. Maw Maw Oo in simfiahnak a nei.

Dr. Maw Maw Oo cun, “Myanmar ram Covid 19 ruangih thi, mi tamsawn cu siizung thleng hlan ih thi lole besia tuk cia in siizung thleng hnu ih thi mi an si” a ti.

September 28, rampi Harhdamnak le Lehpannak zung ih phuang mi ah nazi 24 sungah Covid 19 mina 30 an thi ti a si ih mithi lak ih 15 pawl cu siizung thleng hlan ih thi mi an si.

Leitlun mithiam pawl ih hmuhsuah mi ah Covid 19 nat ih thi, mi tamsawn cu kum upa cakvak lemlo, nat dangdang nei cia an si ih Myanmar ramsung khal ah cuvek thotho in kum upa nat dangdang nei cia mithi an tamsawn.

Dr. Maw Maw Oo cun “nat dangdang nei cia mi in Covid 19 nat an kai tikah an cakvak lo cia thawn an hrisel nakin a tlin lo ih an thi. Cuvek pawl khal Covid 19 ruangih thi in siar tel cih an si.”

“Nat dang thawn damlo besia luar zik pawl cun Covid 19 ṭih ah siizung an pan ngam lohli lo ih, an besia hnu ah sizung an thleng ih nat tuar lo in an thi. Ramsung ih mithi tamsawn cu an thih hnu ih swab lak cawp ih test hnu, result suak hnu lawng ah Covid 19 nat nei an si timi hmuhsuah leh mi pawl an si.”

“Cumi kan zoh nak ih kan hmusuak mi ah, mithi 100 lak ah nat dang tello Covid 19 nat liolio ih thi cu 5 hrawng lawng an si ti`n kan sim thei. Cutin, mithi tamsawn cu natnak an nei mi besia zual ah Covid 19 nat in a bet ruangih thi mi an si” tiah MIR hnen ah a sim.

Cuvek dinhmun kan si ruangah nat dang nei cia pawl cun besia tuk hnu lawngah Siizung pan lo dingin le Covid 19 ṭih ruangah inn ih en kol aw men lo dingin Dr. Maw Maw Oo cun forhfialnak a nei.

Tu ah, Myanmar rampi ah Covid 19 mina 11631 hmuhsuah zo a si ih, mithi 256 le dam suak saal minung 3307 an um zo a si.

Leave a Reply

Your email address will not be published. Required fields are marked *