Naypyidaw ih bomb a puak hnu in Ralhraang pawl an thlaphang a zual

Naypyitaw ih ralkapzung le palikzung ih bomb a puak hnu in ralkap le palik bawi deuh zungkainak hmun pawl cu tuhlan hnakih lethnih rorin an kil ṭha.

Cuih hmun ih zungkai pawl cu security hnen ah ID hmuh fekfek dingin thu an suah. Meithal hriamhrei pai le pailo theitheihnak Metal Detector thawn khal an check thluh ih an taksa tiang an dap sak. Cuih tlunah suncaw kennak teek-te sung tiang an zoh sak thluh ti a si.

“A pehpeh in bomb a puak hnu in humvennak hrang nasaten hmalaknak an nei mi a si. Sunglam mi khal an tel thei tiah an ruat ih zovek khal an si le check awknak an tuah thluh thlang. Taksa dapawk tivekcu Ministry of Foreign Affairs zung tivek lawng ah an rak tuah ṭheu nan a tu cu zung dangdang khalah ralrin nakah ti`n an tuah thlang. Suncaw funnak teek-te tivek tiang an kauter thluh” tiah Naypyitaw ih palik ṭuan lai mipakhat in MPA hnen ah a sim.

Hitiih humvennak hrang nasaten hmalaknak an nei nak san cu October 5 ah palikzung sungah bomb a puak ruangah a si.

Cuih ṭum ah Palikbawi (ဒုရဲမှူးကြီး) Thant Zaw le palik 3 in hriam besia an tuar. Palikbawi Thant Zaw tla cu a Ke khatlam an tan sak phah thluh ih a tu dinhmun khalah a Ke khatlam tan ṭul bet thei dinhmun ah a um.

Cuih ṭum telin tulai Naypyitaw kiangkap ih puakkuainak a suak mi ṭhenkhat cu Naypyitaw PDF cangvaihnak a si tiah kan thei.

Leave a Reply

Your email address will not be published. Required fields are marked *