Nauhak kap that thu ah Mipi ralkap pawl NUG hnen ah an heek

July 9, zaan nazai 11 hrawngah Tanintharyi ramṭhen, Launglone peng, Waydi khua ah mipi ralkap LLPDF in PyuSawHti tiih theih lar U Kyaw Hein inn an kap lai ah kum 7 mi nauhak an kap that pang.

Kah that pang mi nauhak te`i nu cun vanduainak kan tong a si ko ti`n mipi ralkap pawl a ngaidam zo hlei ah NUG hnen ah heek nak zianghman tuah a tum lo thu, DNA hnen ah a sim nan, Democracy Movement Strike Committee – Dawei pawlkom in thuhla felfai zirzoi dingin NUG hnen ah le Human rights thawn pehparmi pawlkom hnen ah an dil ngen.

Thu um dan cu hitin a si …

July 9, zaan nazi 11:20 hrawngah PyuSawHti U Kyaw Hein le Dalan pakhat inn pan in LLPDF pawl an poksuak ih U Kyaw Hein itnak zawn bat in meithal thawn an kap.

Amah U Kyaw Hein cu inn dunglam ihsin a tlanhlo ti a si ih a nupi le nauhak kum 7 mi riangri an kap ngah. Innsangnu cu a Ke ah an kap ngah ih PDF ralkap in kan tuamhlawmta ti`n tuni ah thu an suah.

Tuni ih LLPDF thusuah vek a si le mipi ralkap pawl hin nauhakte hi an kap ngah le ngah lo an ciang lo. Zinglam ah a thih thu kan thei cu kan mangbang zet ti`n thusuahmi ah an ngan tel.

“U Kyaw Hein nupi ke ah hriam a ngah mi kan hmu ih, a kiang ih it ve kum 7 mi nauhak khal kan hmu. A taksa kan zoh sak ih amahcun zianghman a na lo. Zianghman ka cang lo in ti” ti`n LLPDF thusuah mi ah an tarlang.

Cumi buai lai fang le kiangkap Dalan ralrin an pe lai fang hi minute 40 hrawng a rei tiah tarlang a si ih cu hnu in mipi ralkap pawl cu an kir saal.

“July 10, zinglam nazi 5 hrawngah tarlangmi buainak ih tel kum 7 mi nauhak meithal kah nak in a thi ti kan thei cu kan mangbang zet. Zirzoinak kan nei sal tikah U Kyaw Hein nupi kiang ih it nauhak cu kan meithal kah mi in a kap ngah ve thu kan thei” tiah LLPDF cun thu an suah ih mawhphurnak la in ngaidam kan dil duh tiah tuni July 10 ah an tarlang.

U Kyaw Hein nupi le kah that mi nautei` nu hi unau an si ih khua suahsan a ṭul ruangah U Kyaw Hein tei` inn ah an umter sungmi a si. Unau 3 an si ih, amah hi lailak a si.

Khua suahsan a ṭul ruangah kum 4mi nautabik cu a nu in a hruai ih upabik cu a Pi le Pu hnen ah, lailak cu U Kyaw Hein tei` inn ah an tanta lai ah hivekin vanduainak an tong mi a si.

Mipi ralkap heektu Democracy Movement Strike Committee – Dawei cun NUG hnen ah zirzoinak ṭhaten nei dingin le hmual nei mi hremawknak tuah ding an beisei thu an rel.

Zuk : LLPDF

Leave a Reply

Your email address will not be published. Required fields are marked *