Nau pai lai telin mipi ralkap 5 pawl rapthlak zetin That tuar

Magway ramṭhen, Yesagyo peng ah ralhraang ralkap in mipi ralkap 5 pawl cu an nung lai rorin meisa thawn an urkaang that tiah N-YSO (ရေစကြိုမြောက်ပိုင်း ပြောက်ကျားတပ်ဖွဲ့) in June 15 ah thu an suah.

Ralhraang kut tuar mi 5 pawl cu N-YSO sungtel an si ih, thla 5 mi nau pailai CDM Tlawng sayama 1, CDM Tlawng sayagyi 1, nunau dang 2 le mipa 1 pawl an si.

An zaten June 10 ah kaihkhih an si ih an kai nak hmun ihsin peng 1 hrawng hlatnak hmun ah thi cia in an ruak pawl an hmu sal mi a si.

Hih thu thawn pehparin N-YSO ṭuanvonei mipakhat in hitin a rel.

“Kan Sakhaan lak dingin ralhraang ralkap pawl mawṭaw 2 thawn an ra ih lamlak ihsin bomb kan rak puah hnawh. Mithi 13 an um ih an ruak phur in an kir sal.”

“Cuhnu ah thazaang 100 hrawnghrang cu bur thum ah ṭhenaw in in ra nor sal. Tuhlan ih raldo kan zirh nak hmun ah rinlopin an tongaw ih kan ralkap 5 an kai. Cumicu June 10 ah a si ih an ruak pawl cu June 14 ah kan hmu.”

“Miruak 2 cu kut khih in an um ih an zaten an taksa a kaang thluh. Cun, an Ke pawl a bul thluh. Tlan thei lo dingin an Ke an tan hmasa. An kiangkap khalah cerek kuang ṭhenkhat a um.”

“Thu suah mi ah nunglai rorin an Urkaang that kan ti ngam nak san cu an ruak umnak kiangkap ah talbuainak neh pawl a um. Tlansuak thei lo dingin an Ke an tan bul hnu ah nung lai rorin meisa thawn an urkaang that” tiah N-YSO ṭuanvonei mipakhat in LNK hnen ah a sim.

Ralhraang ralkap in N-YSO Sakhaan lak sak in an thilri pawl an urkaang sak thluh hlei ah kiangkap khua inn 100 lenglo an urkaang tiah theih a si.

Leave a Reply

Your email address will not be published. Required fields are marked *