Kalay peng doawknak ah mipi lamṭang ralkap pakhat in ram le miphun hrang nunnak a hlan

Kalay – People Defense Force ihsin colh la zo Pyi Phyo Aung cun April 25 doawknak ah ram le miphun hrang a nunnak a hlan a si.

Kum 28mi Mr Pyi Phyo Aung cu ပ.က.ဖ ralkap pakhat dinhmun in Kalay peng, Natchaung – Chuangkhuah kiangkap ralhraang an do lai ah a nunnak a liam a si.

A rualṭha pakhat cun “amah hi Ko Ti Hah ti`n kan ko ih, Kalay PDF battalion 2 ihsin a suak hnu khalah ပ.က.ဖ ralkap pakhat dinhmun in ralhraang dotu paralṭha a si. Kalay PDF Battalion 2 ihsin a suak ding khalah thinlung thiangten theihternak a nei hai hlei ah Kalay PDF hrangah thatho zetin hnaṭuantlang cio dingin le bawmnak pe ringring dingin thu a cah ta hai.”

“A ṭong ṭheumi pakhat cu ‘Ka nunnak ka hlan ko ding. Nan, ralhraang donakding hriamhrei ralthuam cu in bawm hram ko uh’ ti`n dothlengnak hrangah thinlung tak le thatho zetih pumpeawtu a si. Tu ahcu a tiamkam cia vekin ram le miphun hrangah a nunnak a hlan” tiah a ti.

Kalay peng, Natchaung – Chuangkhuah doawknak ah VAKOK (CNDF), ပ.က.ဖ, RKDF le PDF-Kalay tipawl an tel ih, April 25 doawknak ah ralhraang SAC ralkap 10 hrawng an thi tiah theih a si.

Mipi lamṭang ralkap lam ihsin Pyi Phyo Aung in ram le miphun hrang nunnak a hlan ih, ပ.က.ဖ ralkap 2 in natuklo hriam an tuar.

Doawknak boruak ah Ralhraang SAC ralkap in Natchaung, Chuangkhuah ah inn 40 lenglo an urkaang tiah theih a si.

Siarbet : Kalay peng doawknak ah mipi lamṭang ralkap pawl an cangsual zikte

Kalay peng Chuangkuah le Natchaung kiangkap doawknak boruak ah VAKOK (CNDF) commander in mipi lamṭang ralkap pawl an cangsual zikte thu a refiang.

“Zinglam nazai 10 hrawngin ralhraang pawl an tlansuak zo hmang kan ti ih Chaungkhuah khawsung ah kan lut.”

“SAC ralkap pawl cu khua an rak suah san hrih lo ih, feet 200 hrawng hlatnak hmun ihsin in rak kap. In kap ngah lo ih a zia um zet. Kan ṭannak kan ṭhawn lohli” tiah amahcun a rel.

Ralhraang SAC ralkap in Kalay peng, Chuangkuah le Natchaung khua pawl an urkaang laifang boruak a si ih, hrimkai ṭangrual pawl thawn nasaten an doaw.

Khua urkaangtu ralhraang SAC ralkap pawl cu April 25 sun nazi 12 hrawngah VAKOK (CNDF), RKDF, ပ.က.ဖ le PDF-Kalay ralkap pawl in an kap ih doawknak ah ralhraang lam an tuar na zet.

VAKOK (CNDF) commander cun “Sun nazi 12 hrawngah kahawknak a suak ih, kan nih VAKOK (CNDF) bakah mipi lamṭang ralkap ပ.က.ဖ, RKDF le PDF-Kalay pawl in in ṭangpi ih PDF-Kalay ralkap pawl thawn bomb kam in kan bei.”

“Ralhraang mawṭaw siseh, ပျူစောထီး mawṭaw khal bomb in a puah ngah ih kan do dan a fuh zet. Di a riam zet. Kan kap nak le bomb kan puahmi cun ralhraang tampi a that ding kan zum. Kan nih lam ah ပ.က.ဖ ralkap pakhat a thi. Hriamtuar 2 an um nan an besia lo” tiah KTM hnen ah a sim.

Ralhraang SAC ralkap in April 25 ah Natchaung leh Chaungkuah inn 40 hrawng an urkaang ding zum a um nan boruak a sosang deuh lai ruangah a hmun ah fehin nemhnget theih a si hrih lo.

Leave a Reply

Your email address will not be published. Required fields are marked *