Myeik Myo dinhmun a ṭha lo, Mi 4 an kap that zo

March 26 ih lamzawh duhphorhnak neitu Myeik myo (မြိတ်မြို့) mipi cu ralkap le palik pawl in an ṭhenṭhek ih meithal thawn an kap ciamco hlei ah an hruang tivek khal an ur sak tiah ramsung media ṭhenkhat in an tarlang.

“Suun nazi 12 hrawng in ralkap le palik pawl in meithal an kap puak thok. Tuhrih tiangah a malbik mi 4 an thi zo. Lamzawh pawl in ṭhenṭhek thluh ih meithal an kap ciamco ruangah kaingkap remcannak inn sung ah kan lut thluh.”

“Inn leng khal kan suak ngam hrih lo. Innsung ih um mi nupi nu khal an kap thotho. Amalbik minung 20 in meithal hliam an tuar. A besia khal an um tikah mithi an pung ding zum a um” tiah Myeik myo cangvaihnak ih telve mipakhat in RNA media hnen ah a sim.

Ralkap le palik pawl cu zaan lam nazi 4 tiang khalah motor pangai, bike, ambulance, meithat motor le an mah ralkap motor tvk thawn khuasung vengtinkim ah an lut an suak ih an hmuh mi a remrem cu an kap hluahhlo tiah ramsung media ṭhenkhat in an tarlang.

Cuihtlun ah mino deuhdeuh bat in kaihkhih mi khal an nei ih an kaimi pawl cu hridai thawn ṭawn in ui le rannung men bangin an khawr.

Khuasung lailak khalah mei an ur ih mi hruang tivek khal an siat phah vivo. Mipi an kah nakah innsang ihsin sniper an hmang ih cuih hmun va pan pawl cu an rak kap hluahhlo. Mithi 4 lakah nupi nu pakhat le mino khal an tel tiah RNA media in a ngan.

Leave a Reply

Your email address will not be published. Required fields are marked *