Myanmar Entertainment khawvel ah Thimzing a tlung, ruah san ding a mal

Ralkap ukhruainak dodal in rampihuap mipi cangvaihnak a cak zet hnu February thla lai hrawngin Daan lo ih rampi thuneihnak latu SAC ralkap thlaphang in a um thok ih CDM thapetu le mipi lam ṭangtu Myanmar lemcang khawvel ih hminthang siseh, mipi thinlung neh zettu social influencer pawl khal ပုဒ်မ ၅၀၅(က) thawn thubuai tuah sakin SAC ralkap in kaihkhih an tum thok ih ca phunphun suah in mipi an ṭhih thok.

SAC ralkap ih thusuahmi ahcun “rampi a keel awh thei ding duhlo ruangah tumtah nei in cozah hnaṭuan CDM tel dingih thapetu, Daan loin rampi ukhruai tumtu CRPH thapetu, thuthang diklo thehdarhtu, khuatlang mipi hremawknak (social punishment) tuahtu cu ပုဒ်မ ၅၀၅(က) orh terin thubuai tuah sak an si ding” tiah SAC ralkap in mipi theihternak an nei.

Adanglam zetmi pakhat cu ပုဒ်မ ၅၀၅(က) thawn thubuai an tuah sak mi ah Kawlram Entertainment khawvel (Zuknung, Music le mipi tihlimnak dangdang) ih hminthang tamzet an tel. Cuvek a si tikah SAC ralkap ih thubuai tuahmi hin Myanmar Entertainment khawvel nazetin a khawng tham pei maw timi ruahding a um.

SAC ralkap in thubuai a tuah sakmi Myanmar ih mihminthang ṭhenkhat cu လင်းလင်း, မောင်မောင်အေး, လူမင်း, ဝိုင်း, အာဇာနည်, အိန္ဒြာကျော်ဇင်, သန္တာလှိုင်, မင်းမော်ကွန်း, သက်မွန်မြင့် , ကျားပေါက် + Han Htoo Lwin (2?), ဇာဂနာ , director မင်းထင်ကိုကိုကြီး, ကျော်သူ … tvk an si ih kaihkhih tuar zo khal an um ih hmun dang ah himnak hawl ih rak beu man khal an um.

Thubuai tuah tuar cazin kan zoh a si le Myanmar zuknung khawvel ih mihminthang, director, Music khawvel ih hminthang milar tamzet an tel ih thubuai an tuah sak mi lawng hman ah buai tham a si zo.

Asancu hih mihminthang pawl thawn pehpar awmi zuknung, music tvk pawl cu khuatlang ah tlangzarhnak neilo dingin le tlangzarhnak neitu hmuahhmuah cu thubuai tuahsak an si ding tiah thuthannak an nei. Cuihtlunah April 4 ah ramsung TV/Video network neitu le FM radio station hnen khalah tlangzarhnak neilo dingin SAC ralkap in ralrinnak ca a pe hai.

Kawlram ah hin zuknung phunphun thlahsawngtu zuknung media le Application phunphun thawn zuknung, music tivek thlahsawng ih pumcawmtu media/company tamzet an um ih cupawl khal SAC ralkap ih thusuahmi in nasa zetin a khawng ban hai. A ṭheuh suah hai. Mipi ih duhbikmi, sum an laklutnak bik hminthang pawl ih zuknung, hla tivek an thlah thei nawnlo ruangah harsat an tong.

Myanmar Entertainment khawvel ah tuhlan kum 1 luan zo, 2020 kum thok hrawng khan harsatnak an tong thok zo. Covid 19 boruak in zuknung khawlvel a ti cawl ih zuk thok mi, zuk ṭheh zik mi, tlangzarh manzomi zuknung zateel in a um. Zuknung khawvelmi mipakhat cun zuk ṭheh zomi zuknung zatekom man hi kyat billion 60-100 hrawng a si ding a ti. Cupawl cu Covid boruak um lo in ralkap in rampi tibuai hlah sehla tlangzarh manzomi hlir an si ih paisa billion tamzet laklut theihnak lamziin pakhat a si ih Myanmar Entertainment khawvel cu a keel te a awh ter thei ding.

Myanmar Entertainment khawvel ah tlaksiatnak tuartu midang pakhat cu zuknung piah nak innpi saktu pawl an si. Tuhlan ralkap ukhruainak san lai ah rampumhuap khua tamzet ah cozah ta zuknung piahnak zung tawkmawi a rak um. Cupawl cu thuneitu an mah pawl thotho in an ṭheuhsuah thluh ih zuknung piahnak zung a mal phah hlei ah Entertainment khawvel ah tlatsiatnak tumzet a rak thleng. Cumicu kum 2015 hrawngin hram ṭan sal a si ih a feh tluang zik thlang tifang ah Covid boruak le rallokap buainak a rak suak lala.

Atakcun, a tu ih ပုဒ်မ ၅၀၅(က) thawn Myanmar ram ih milar thubuai an tuah sak mi hi March 30 ih SAC ralkap meeting ah ralbawi MAH ih forhfialnak ihsin a ṭan thokmi a si.

Ralbawi MAH in ruahnak pe phungpha vekih a ṭongsuak hnu nihnihnak hrawngin ပုဒ်မ ၅၀၅(က) orh ter ih thubuai tuahsaknak cu Facebook cahmai ah a lang thok. ပုဒ်မ ၅၀၅(က) cu mipakhat in cozahpi/ralkap a dokalh caan ah siseh, a hnaṭuan upatlo, ziangah siar lo ih a um tikah thubuai tuahsaknak ih hmanmi a si ih cuvek daan pahbaltu cu kum 2 thawngtlak lole paisa kuan lole a pahnih ih tuar ding khi a si. Asinan, tu ahcun ပုဒ်မ ၅၀၅(က) cu SAC ralkap in an mah duhdan zawngin an rem an phuahcawp betih anmah dokalhtu le an mah duhlo zawngih umtu hremnak ah an hmang.

Tuah, kan dinhmun kan zoh a si le ပုဒ်မ ၅၀၅(က) thawn kum 3 thawngtlak dingih thuṭhensak mi hmuh ding an um ih ပုဒ်မ ၅၀၅(က) thawn thubuai tuah sak mi midang pawl khal an kai a si cun thawngtlak thei dinhmun an si. Cumi ah Kawlram Entertainment khawvel ih lemcang thiam hminthang, director hminthang le mithupi tamzet an tel ih ralbawi MAH in tuvekin rampi cozah thuneihnak a kai ringring cun a ciim cuahcomi rampi pursumnak, Fimzirnak, Harhdamnak lam vek thotho in Myanmar Entertainment khawvel khalah thimzing a tlung dingih tungding sal theinak lamziin hmuh a har zet ding tiah ramkhel mithiam pawl in an rel. ***(စည်သူအောင်မြင့် via VOA, + Opinion)

Leave a Reply

Your email address will not be published. Required fields are marked *