Myanmar ramsung ASEAN palai rat ding thu ah Min Aung Hlaing in a cohlang

Myanmar buainak hrang hmalaknak neituding ASEAN palai cu Kawlram sung lut ding in SAC ralbawi Min Aung Hlaing in a lungkimpi tiah theih a si.

Cumicu April 24, Jakarta ih tuahmi ASEAN meeting thusuak a si tiah Singapore Prime Minister Lee Hsien Loong in a ti.

Myanmar ram aiawh in ralbawi Min Aung Hlaing telnak cuih meeting ahcun ASEAN hruaitu pawl in kawlram sungah thlengawknak phun 6 nei ding an beisei thu an relsuak. Cumi ah Myanmar ramhrang hmalaknak neituding ASEAN palai cu Myanmar cozah ṭuanvonei pawlin ramsung ah hmalak siannak pe ding thu a tel cih.

Culodang dilngennak an nei mi ah hriamhrei ralthuam hmangin mipi thatvatnak an tuah ṭheu mi titawp ding, ram thuhla ruangih kaihkhih mi pawl thlah zalen ding, ASEAN hoha nakin mihring pianvo thawn pehparmi pawlkom le party dangdang pawl ih bomnak cohlang/siannak pe ding tipawl a tel.

“Atawp ahcun rabawi Min Aung Hlaing khalin kan dilngenmi thuhla ah a ṭong suak ve” tiah Singapore Prime Minister Lee Hsien Loong cun a ti.

Amah cun “nan relduhmi ka thei thiam a ti. Aṭul a timi point tete cu a ruat ṭha ding. Kan dilngenmi thu ah ASEAN sungtel dinhmun pakhat in kut kai aw in hmalaknak a nei vivo ding” a ti.

Cuihtlunah Singapore PM Lee Hsien Loong cun Myanmar ramsung fehtuding ASEAN palai thu thawn pehpar in tuṭum ah ASEAN pawlkom pakhat dinhmun in kutza kai tlang in hmalaknak an nei ngaingai ding a zum thu a rel cih.

“Aciangmi pakhat cu atakih tuahsuak dingin zawh dingmi lamziin a sau lai men ding. Asancun nangmah lam in a hraang zawng ih cangvaihnak titawp ding timi le ram thu ruangih thawngtla pawl thlahzalen ding timi ṭongsuak ding a um lai ruangah a si. Cumicu hluhsuak ko tuah dingmi thu pakhat a si” tiah a ti.

“Cun, ram thuhla pakhat ti felfai ding ah kau famkimmi reltlangnak nei harsa zetlaifang a si. Nan, titlang theihmi level ṭhenkhat cu a um ko” a ti.

Cuhnuah ASEAN palai dingah Singapore aiawh in zo a tel ding, ASEAN pawlkom ih ramtin komkhawmmi palai an dingsuak thei pei maw timi rel a theih hrih lo a tikhalin Mr. Lee cun a sim bet.

“Asinan, a huap zawngin cu tui` hmuhtonnak hi ṭhathnemnak a nei tiah ka sim duh. Himi hin Ke kan kar bet dingmi pawl in khihhmuh. ASEAN pawlkom dinhmun in hih meeting hi tuah lo bang seh la, cuti a si lo le thuthluknak pakhatkhat tal rak nei theilo bang seh la kan dinhmun kan boruak a se zet ding” tiah Mr. Lee in a ti. (CNA)

Leave a Reply

Your email address will not be published. Required fields are marked *