Myanmar ram Lemcangthiam U Kyaw Thu in Covid 19 nat nei

Myanmar ram Lemcangthiam le Free Funeral Service Society (FFSS Yangon) Chairman a si mi U Kyaw Thu cun October 21 zianglam nazi 11 hrawng ah Covid 19 nat a nei thu a mai Facebook cahmai ah a tarlang.

FFSS sungṭuan mipakhat in Covid 19 nat a nei mi hmuhsuah a si hnu ah a mah naivai ih um pawl nat hrik check nak an nei bet sal nak ih hmuhsuah mi a siih U Kyaw Thu cun “P ka si zo. Mipi hrang ih pumpekawnak ih ka ngah mi a si ruangah hmaihngal zet in ka co hlang ngam a si.”

“Kei mah ka um lo khal le mipi hrang ih pumpeaw ngamtu ka ai ih miralṭha an suak ding ti ka thei. Ka um lo khal le mipi hrang ih hram kan bun zo mi innpi cu hngetkhoh sin in a ṭhangso sinsin ding. Hmailam hrang ih timlamawnak nei cia ding mi cu hruaitu ih hnaṭuan a si. Nan mah lam khal ih lungrual ten ṭuantlang a ṭul ve” tiah a Facebook cahmai ah a ngan.

U Kyaw Thu cu Yangon ih Free Funeral Service Society dinsuaktu lak ih mithupi pakhat a si ih cuih pawlkom hmin in kum 20 lenglo mipi riantu a si.

Lung lam damlonak ruangih operation tuah zotu a si ruangah le zunthlum nat nei a si ruangah ralring fimkhur ten tuamhlawmaw dingin mipi in duhsaknak an hlan a si.

Leave a Reply

Your email address will not be published. Required fields are marked *