Myanmar ram ih Covid 19 vaccine hmanthokding tikcu an phuang

2020, December thla ih tawlrel a si mi India ram suak Covid 19 vaccine cu 2021, February thla sung ah Myanmar ram ah hman thok a si thlang ding tiah rampi thuron Daw Aung San Suu Kyi in a sim.

Leitlun huap vaccine tuah company tumbik pakhat a simi The Serum Institute of India tuahmi COVID-19 vaccine cu Myanmar ram mipum taan 15 deih lei dingin ramhnih hminkhennak an nei zo ih Drugs Controller General of India in a ramsung ah hmansiannak a pe veten Myanmar ram lam ah laklut cih an tum ve a si.

“February thla ah Harhdamnak lam hnaṭuan pawl kan dawt hmaisabik ding ih rampi huap in 2021 kum sung ah a sangsang ten dawt suak ṭheh thei beisei a si. Vaccine ret nak ding khal tawlrel a si ih dawt tikcu ih hmalak danding thuron mithiamsang pawlkom khal dinsuah a si zo” tiah rampi thuron Daw Aung San Suu Kyi cun a sim.

Curuangah Covid 19 vaccine tlangzarh a si hlan sung, rampi Harhdamzung lam thusuah mi pawl cu mipi lam in thlun tengteng a ṭul hrih thu khal a sim peh bet a si.

Tudinhmun ah Myanmar ram ah Covid 19 mina 125,616 hmuhsuah a si zo ih dam sal 108,660 le mithi 2,711 an um zo a si.

Leave a Reply

Your email address will not be published. Required fields are marked *