Myanmar ram hmaihngal tertu MiMi Aung (NASA)

Leitlun ram tinkim ih sunmang a si mi Mars Leisen par ih mai` ram hmin khen dingah Myanmar ram khal a tel ve zo a si. Cumicu, NASA ih hnaṭuan Myanmar ram mi engineer MiMi Aung fimnak ruangah a si.

Mars Leisen par ih boruak umdan le Leiram umdan zoh dingih an thlah mi Mars Helicopter Ingenuity cu MiMi Aung hohanak in NASA’s Jet Propulsion Laboratory ah tuah mi a si.

Cuih helicopter cu Mars Leisen par ah nunnak nei mi neh (signs of alien life) hawl ding ih tuah mi, Mars Perseverance rover motor thawn July 30 ah Cape Canaveral, Florida ihsin an thlah suak zo ih an lamtluan a tluang a si le February 18, 2021 ah Mars Leisen par ah an thleng ding.

Cuih hmun ah tluangten thleng in robot helicopter fate in a ṭuan dingmi a ṭuan suak thei a si le hnaṭuan hohatu MiMi Aung le ho pawl cu cawisang an si ding. Cuhleiah Myanmar rammi MiMi Aung hohanak thawn tuah mi helicopter a si ruangah Kawlram keneh Mars Leisen par ah tanta in a um kan ti ngam dingih kan ram hmin khal a ṭha phah thluh ding a si.

MiMi Aung Thuanthu Tawi
MiMi Aung cu 1968 kum, Illinois, Champaign-Urbanan ah a piang. A nu le pa khal hih hmun ah PhD degree an ngah veve ih, a nu cu Math thawn Myanmar ram ih PhD ngah hmaisabiktu a si.

MiMi Aung kum 2 a si ah a nu`i ram Myanmar ah an vai ih, cu hnu in Malaysia, British tlawng ah fimnak a zir thok. A nauhak lai ihsin thluak ṭha zet a siih tlawng a kaainak khal ah a pakhatnak ngah ringringtu a si.

Kum 16 a si ah mirang ram ah tlawngkaai dingin a feh ih Illinois ah a rualpi pawl thawn inn hlang in an um. Cuih hmun in Blue Mound High School ah tlawng a kaai ih ca a thiam tuk ruangah thla 10 sungah College a kaai thei cih. Cutin tlawng a kaai peh vivo ih electronic engineering zir in 1990 kum ah University of Illinois ihsin Master degree a ngah a si. Master degree a ngah mi le a thiam mi cu communications and signal processing lampang a si.

1990 kum ihsin a sunmang a si mi, Science thawn pehpar mi NASA Jet Propulsion Laboratory ah hna a ṭuan thok ih, tuah, Mars Leisen lam pan ih an thlah mi Mars Helicopter Ingenuity tuahtu lakah hotu dinhmun in hna a ṭuan rero a si.

ref:Wiki

Leave a Reply

Your email address will not be published. Required fields are marked *