Myanmar raltlan minung 14 cu India cozah in Kawlram ah a kuat kir sal

Ralkap ukhruainak hnuai ih hnaṭuan duhlo ruangah raltlan dinhmun in India ram lam ih beunak hawltu Myanmar rammi minung 8 (amalbik) cu Delhi ih um cozah thupeknak vekin ramri kiltu Assam Rifles pawl in Kawlram ah an kuat kir sal tiah Aljazeera in a ngan.

March 15 ah beunak hawl in India ram ih tlanlut Myanmar raltlan pawl khal kuat kir sal mi ah an tel tiah theih a si ih Farkawn khuami upa pakhat cun “India ram ah March ni 15 ih ratlanlut Myanmar raltlan minung 14 pawl cu ramri kiltu Assam Rifles pawl in Myanmar ram ah an kuat kir sal” tiah a sim.

Myanmar ram ih kuatkir salmi raltlan pawl hi zovek an si, ralkap palik tlan maw cozah hnaṭuan an si tikhal theih a si loih ralkap kut ah an ap maw aplo tikhal an ngan tel lo.

Ramri kiltu Assam Rifles pawl cun India ram ih tlanlut Myanmar raltlan hi minung 264 hrawng an si tiah record an ngan ih cumi ah ṭhenli lakih ṭhenthum cu palik le ralkap an si tiah an sim.

India ram ih tlanlut Myanmar raltlan pawl hi Mizoram cozah cun hahdam zetin a co hlang nan Delhi ih um Minister of Home Affairs Amit Anil Chandra Shah cun “Myanmar ramri ih um Mizoram, Arunachal Pradesh, Nagaland, le Manipur cozah pawl hin kan ramsung ah refugee lutter theinak thuneihnak an nei lo” tiah the Hindu hnen ah a sim a si. (Aljazeera)

Leave a Reply

Your email address will not be published. Required fields are marked *