Myanmar : Kum 1000 luan zo hrawng ta siding zum um mi Rohlu phorh suak

Pyu (ပျူ lole ပျူလူမျိုး) phunhnam pawl ih thlanmual hlun siding zum um mi cu Magway ramṭhen, Minbu Township, Chaung Kauk khua kiang mual ah hmuhsuak a siih khua kiangkap mi bur in hlanlai rohlu thliṭha hmusuak beisei in Lei an laai ciamco.

October 6 ah hih hmun ihsin hlanlai thilri siding zum um mi puumṭek ṭhi, bungrua le hriamhrei ṭhenkhat hmuhsuak a si timi thuthang a suak ih khua kiangkap mibur in Leilung an lai ciamco ruangah hmunram neitu in khua uk hnen ah a report.

Ṭuanvo neitu in lai nawnlo dingin mipi hnen ah a sim than nan October 10 zaan tiang an lai thotho ruangah palik an ko ih mibur ṭhekdarh dingin methal zuun 6 an kap tiah BBC cun a tarlang.

An phorhsuak mi bungrua, puumṭek ṭhi le hriamhrei ṭhenkhat pawl cu tuhlan kum 1000 luan hrawngta siding zum a um tiah Magway Division Archaeologist Ye Lwin in BBC hnen ah a sim ih thuciang theisuak dingin zingzoinak kan nei lai a ti.

Pyu miphun cu Tibetan-Burmese cii rawi phunhnam lak ih Myanmar ramsung khua toh hmaisabik an si ding tiah zumnak a um ih 4th-5th AD hrawng ah Irrawaddy tipikap tluan ih khawsa an si.

Pyu miphun cun Myanmar ram laifang tak ah Tagaung, Halin, Maingmaw, Binnaka, Beikthano, Sri Ksetra timi khua pawl an toh ih, 8th century thok lam, Nan Kyauk raltho ṭum ah ṭhekdarh ṭheh an si ih Karen, Mon phunhnam ah fin aw in an hlo lan ta tiah Wikipedia ah an ngan a si.

Leave a Reply

Your email address will not be published. Required fields are marked *