Myanmar Foreign Minister Zin Mar Aung le CM Pu Zoramthanga an tongaw

India rampi cozah danphung pahbal in Mizoram Chief Minister Pu Zoramthanga in CRPH palai Myanmar Foreign Minister Zin Mar Aung a tong ….

Myanmar raltlan thu ah Mizoram cozah le India central cozah lung tongaw loih an um lai ah Mizoram Chief Minister Pu Zoramthanga cun CRPH palai Myanmar Foreign minister Zin Mar Aung cu online hmaton in a tong.

Hih thuthawn pehpar in Mizoram CM Pu Zoramthanga cun “tuizing ah Myanmar Foreign Minister Zin Mar Aung thawn a hlawhtling zet mi online hmuhtonawnak kan nei” tiah March 21 ah a tweet ih India Union Home Minister Amit Shah le Kawlram ih India Embassy khal a tag tel cih.

Hih online virtual meeting ah hin US hrambun Mizo hruaitu ṭhenkhat khal an tel ih atufang Myanmar rampi buainak thu le hmailam ih thil thleng thei thu pawl khal an rel tiah theih a si.

India cozahpi hin Myanmar rampi ukhruaitu cozah dik hi Committee Representing Pyidaungsu Hluttaw maw State Administration Council (Kawl ralkap) sawn an si timi ah February 1 ihsin tuini tiang a ṭongsuak hrih lo nan atui Pu Zoramthanga cangvaihnak hin Mizoram cozah cun CRPH hi Myanmar cozah dik ah a pom sawn ti a langter a si.

India central cozah cun kum 1951 United Nations Refugee Convention ih lungkimtlangnak hminkartu an si lo mi khihhmuh in a ramsung ah Myanmar raltlan lutterlo dingin ramri ah ralkap phunphun a kil ter.

Cuti cingin Mizoram cozah cun Chin raltlan (Myanmar) tamzet cu cangvaih dan phunphun suah in a rak cohlang ih tuisun tiangah Chin raltlan 500 hnak ih tam a rak fingkhawi tiah theih a si.

Leave a Reply

Your email address will not be published. Required fields are marked *