Muse khualaili ah a zonzon in Bomb 3 puak kuai

April 22, zinglam nazi 11 hrawngah saklam Shanram Muse khualaili takah a zonzon in bomb 3 a puak tiah theih a si.

Zinglam nazi 11 hrawngah Muse khualaili takih um nazi innpi hmai ah motor cycle to mi pahnih in caku bawm an tanta ih cu hnu reilote ah a puak mi a si tiah kaingkap ih um pawl in an sim.

“Sound bomb tikhalih koh mi stun grenade a puak. Motor cycle to mipahnih in caku bawm an ra hlon ih cuhnu reilote ah bomb 3 a puak. Hliamhma tuar le khawngaw cu an um lo” tiah nazi innpi kiang ih um mipakhat in SN hnen ah a sim ih “a puah tu zo an si ti cu theih a si lo” a ti.

Muse ah ralkap ukhruainak dodal in lamzawh duhphorhnak nei hlah hai seh ti`n khualaili ah SAC ralkap le palik an duty ringring ih cuti cingin sun lai rori ah bomb a puak cu ruah ding a tamzet tiah khuami pawl in an sim.

Khuasung um mipakhat cun “Ralkap le palik um cingin sunpadir rori ah bomb a puak cu mangbang umzet. Mipi áš­hih nakah an hmang siding” a ti.

Muse ah ralkap le palik nasaten an duty ringring nan mipi lam khalin ziin dangdang hawl in ralkap ukhruai dodal cangvaihnak an nei ringring.

Ralkap in kumpi cozah thuneihnak an la hnu ni 80 tiangah Muse ah mipahnih kahthat an si zo ih kaihkhih tuar 30 hrawng an um tiah Shan thuthang in a ngan.

Leave a Reply

Your email address will not be published. Required fields are marked *