Monywa mipi : Ko Wai Moe Naing nan hrem luan cun Palik le Ralbawi fa le nunnak kan la ve ding

April 15 ih kaihkhih tuar Ko Wai Moe Naing thuthawn pehpar in Monywa mipi in SAC ralkap le palik an hringhro ih hringhronak catawi nganmi cu online ah a darh.

“A nunnak (Ko Wai Moe Naing) hrang tiang phan ding um dinhmun a thleng pang cun Monywa ih palikbawi le ralkap bawi fa le nunnak thawn phuba kan la ding” tiah ca an ngan.

Ko Way Moe Naing cu Monywa ralkap ukhruai dodalnak ih rinsantlak mipi hruaitu pakhat a si ih rampumhuap ih hminthang milangsar a si.

April 15 sun ah motor cycle thawn lamzawh duhphorhnak an nei ih, culai ah an hmailam ih ra motor pakhat cun a mah rori bat in rinlopin a pah hrim hai. Cutin Ko Way Moe Naing cu SAC ralkap in an kai cih ih reilote hnu ah a kut dunglet ah ṭawn in taksa durhdawm vuakthawinak neh thawn an zuk mi cu online ah an thlah.

Khawinah hmun ah an ret ih a dinhmun ziangvek a si ti cu felfaiten theih a si lo nan online ih an thlahmi zuk ahcun vuakthawi hrem tuar ding khi a bang.

Curuangah mipi lam cun a nunnak hrang tiang an phang sak ih thlah zalen lohli dingin le hrem lo dingin SAC ralkap an theih ter.

Ko Way Moe Naing cu rampihuap Dothlennak hruaitu ṭhenkhat vekin SAC ralkap in pukmah 505 orh terin thubuai an rak tuah sak zo mi a si.

Edit : “ralkap 2 thattu ah an puh” ti`n ramsung media ṭhenkhat in an tarlang.

Leave a Reply

Your email address will not be published. Required fields are marked *