Monywa ih Lamzawh Duhphorhnak ah Mi 6 an kap that

April 3 ih Sagaing ramṭhen, Monywa lamzawh duhphorhnak ah palik le ralkap in meithal kap puak in mi 6 an kap that tiah theih a si.

Duhphorhnak ih hruaitu pakhat cun “Sun nazi 1 tiang ah သီတာလမ်း ah mi 3 an thi. နန္ဒဝင် khalah 3 an thi. 10 hnak ih tam in hliam an tuar” a ti.

Monywa ah April 3 zingpit in lamzawh duhphorhnak an nei ih palik le ralkap pawl cun a zingzing in mibur ṭhekdarh an tum meithal an kap ciamco.

Hmaisabik ih an kap that mi cu kum 20 mi mino 2 an si ih an kap nak hmun rori ah an thi cih. Culai fangah hliam tuar dang mipahnih cu ralkap pawl in an rak hnuk man tiah mibawm hnaṭuantu mipakhat in Myanmar Now hnen ah a sim.

Ralkap le palik pawl cun mipi cu hmun 3 rorin an kulh ih meithal thawn an kap ciamco. ဗိုလ်တေဇ lamziin ih ralkham hmunkhuarnak cu hmaisabik ah an ṭhekdarh. Cumi ah mipakhat cu a Lu ah an kap ngah ih a hmun rori ah a thi cih.

Lamzawhnak ih telvetu mipakhat cun “ralkham/ziinkham nak dungtasawn ih um mipakhat cu a lu ah an kap ngah ih a hmun rori ah a thi cih. Kan umnak thawn hlat tuk lemlo mi Tower ihsin an kap ding mi abang. Athluak a darh thluh ih a kiang ih um pawl taksa par khalah a perh thluh” tiah Myanmar Now hnen ah a sim ih “kiangkap ih um mipi tamzet cun Inn le Lo tlansan in an tlan. Meithal awn cu dai ti a nei lo” a ti.

Cuti cingin lamzawh duhphorhtu pawl cu minung pung khawmaw in hmai an nor thotho ih lamzawhnak khal an tumtah vekin an ṭheh suak tiah ramsung media pawl in an tarlang.

Rampi a buai thok ihsin Monywa ah ralkap le palik pawl ih kah that mi mipum 25 hnakih mal lo an um tiah theih a si ih ralkap kaih tuar le hliamhma tuar cu felfai in theih a si lo. (Myanmar Now, RNA)

Leave a Reply

Your email address will not be published. Required fields are marked *