Mogok ih inn ciim ah nauhak telin mithi 11 le hriam tuar 3 an um

Tuizing, August 24 ah catbang loin ruah a sur ruangah nitlaknaklam Mogok myo, Aung Thit Lwin veng ih inn a ciim ih mithi 11 le hriam tuar 3 an um.

“Mithi 11 lakah nauhak khal an tel. An inn a tum zet ih a luah tu khal an tam. An inn cu innhnih peh ih sak mi vek a a si” tiah Mogok khuami mipakhat cun mithi 11 pawl cu innkhat luah tlang an si thu a rel a si.

Hriam tuar mipathum cu Mogok khuatlang siizung ah zohkhen an si ih an dinhmun theih a si hrih lo tiah a sim bet hrih.

“Catbang loin ruapi a sur ih lelung a nem thluh. An inn hi inn menmen a si lo. Tlakrawh inn a si ih lei nem in hnuai lam ah a dir ih a sung lam ah an inn a ciim thluh” tiah Mogok khuami cun a rel.

Inn ciim lakih miruak cu zing ihsin an buaipi ih zaanlam nazi 4 le hrek hrawngah an zaten an phorhsuak thluh thei tiah TNA in a tarlang.

Leave a Reply

Your email address will not be published. Required fields are marked *