Misual ralbawi Min Aung Hlaing kai sak dingin NUG in INTERPOL hnen ah heeknak ca a kuat

April 24 ah Indonesia ram ih meeting kaituding ralbawi Min Aung Hlaing cu Indonesia a thlen veten misual dinhmun in kai lohli dingah National Unity Government of Myanmar in INTERPOL (The International Criminal Police Organization) hnen ah dilngennak ca a kuat.

Cakuat ahcun “Min Aung Hlaing cu Rakhine ram ih Rohingyas ciimittum thu thawn pehpar in ICJ (International Court of Justice) le ICC (International Criminal Court) ah misual pakhat dinhmun ih puhmi a si thu, 2021 February 1 ah daan loin Myanmar rampi cozah thuneihnak a la thu, Cozah hnaṭuan CDM luttu telin ralkap ukhruainak dodaltu mipi 700 luan that tuar nak ih mawh phur tubik a si thu le ralkap ukhruainak dodaltu mipi 3000 luan kaihkhih tuar thu ah mawh phur tubik a si thu tvk an ngan tel.

Cuvek, ngaithiam theihlo sual phunphun tuahtu a si ruangah NUG in ICJ le ICC thuṭhenzung hmai ah suahpi thei dingin Indonesia ram a thlen veten INTERPOL le Indonesia palik hohanak thawn kai lohli dingin NUG in INTERPOL hnen ah ca a kuat mi a si.

Cuih tlun ah INTERPOL khalin misual pakhat dinhmun in pomsak dingin le INTERPOL sungtel leitlunhuap ramdangdang palik hnen khalah a sangbikmi ralrin simthannak nei dingin an dil cih ih NUG dilngenmi pom sak in Min Aung Hlaing kaihkhih a si cun sual a tuahmi ruangah thuṭhenzung ah suahpiding a si thu an ngan tel a si.

INTERPOL (International Criminal Police Organization) cu France ram hrambun palik pawlkom tumzet a siih leitlun ram 194 pawl ah member tamzet neitu a si.

Leave a Reply

Your email address will not be published. Required fields are marked *