Mipi ralkap komkhawm in Kalaymyo mipi hnen ah ngaidam dil

May 28, Kalaymyo, Tahan khawsung doawknak boruak ah nunnak liam mipi 3 an um mi thuthawn pehparin mipi ralkap komkhawmpi in Kalaymyo mipi hnen ah ngaidam an dil.

Ngaidam an dil rualin khawsung kahdonak a um pang cun phenawknak hmun remcang ah bokkhupin mah le mah humkhamaw dingin mipi ralrin an pe cih a si.

Siarbet : Mipi ralkap pawl ih Tahan khawsung doawknak thusuah (May 29, 2022)

May 28, zaanlam nazi 6 hrawngah mipi ralkap ṭangrual pawl in Tahan khawsung (နေကြာတိုက် kiang)
ralhraang umnak an kap ih SAC ralhraang 4 hrawng an thi.

Tongpakap ih va kap men siloin “cozah dik a si lo mi SAC ralhraang in daan loin mipi meisa man an khong mi ti tawp dingin ralrin kan pe nan, an thlun duhlo ruangah rilrinpek betin kan kap mi a si” ti`n mipi ralkap pawl cun thu an suah.

Doawk thu thawn pehparin Zomi-PDF ṭuanvonei mipakhat cun “ralhraang in Wesly sizung kiangin ralthuamtum thawn voi 4 lenglo an kap. Tatyin 228 lam khalin ralthuamtum thawn voi 3 an kap ih khawsungum mawhneilo mipi 3 an thi.”

“Doawknak ah Ralhraang SAC ralkap 4 hrawng an thi ti`n kan zum ih hriam tuar besia khal an um. Kan nih lam cu himdamten dung kan siip thei sal” tiah a ti.

Ralhraang kut tuar khawmi 3 pawl cu thla 6mi nautenu Vanlalawmpuii, kum 25, le sahimnak hawlin Minkin ihsin Kalaymyo ah beutu nufahnih, Daw Ni Ni Aye, kum 47, le a fapa BungMyatOo, kum 26, tipawl an si.

May 28, Tahan khawsung doawknak ah Zomi PDF, CSS, CNDF, PDF Kalay le GRF ralkap tipawl an tel.

Leave a Reply

Your email address will not be published. Required fields are marked *