Min Aung Hlaing le ho Thuthup puut suak

Min Aung Hlaing hohami kawl ralkap in kumpi cozah thuneihnak an la hlan, 2019 kum lam in ramsung biakpawhnak company ṭhenkhat le internet company picang ṭhenkhat cu mipi thlingthlathup nakding spyware an bun ter.

Cumicu thuhla felfai theitu in Reuter hnen ah an simmi a si ih, ramsung company dangdang ih hnaṭuantu minung 12 hrawng hnen khalah sutciangnak an nei bet hnu ah pholang mi a si. “Ministry of Transport ih ṭuanvonei ṭhenkhat cu ralkap hlun, SAC ralhraang milai an si ih dinglai cozah thusuahvek phungpha in an tawlrel. Ralkap thluak a si ti kan thei nan el theihmi a si lo. Hih thuhla tawlrelnak ah ralkap kuthnuai ih um Ministry of Home Affairs khal a tel ih ralkap lamṭang rampi ukhruaitu Luban ṭhenkhat khal an tel” tiah thufelfai theitu cun a ti.

Spyware timi cu computer thawn hmankop dingmi phone, computer le cet dangdang hack/control theihnak software a si. Spyware thawn mi phone call an ngai thup thei, message le web email khal an zoh sak thei. Cuhleiah biakpawhnak le Internet company bawmnak ṭul loin cuih technology hmangin mi umnak an zawt thei. Cumi leinak dingih tawlrelmi NLD cozah san ih (kum 2019-2020) budget $4 million bill cu Justice for Myanmar timi dothlennak cangvaitu pawlkom pakhat in Reuters hnen ah a pholang thluh. (Reuters hnen ih pholangmi 2019-2020 kumpi budget $4 million bill document cu atak maw alem a si timi thei cing dingin Reuters rori`n bulpak in zingzoinak a nei ih atak a si thu nemhnget fel mi a si).

2019-2020 budget $4 million bill hi khuatlang mipi hnen ih pholangmi a si lo ih hih thuthawn pehpar in le mipi thlingthlathup dingmi thu ah NLD cozah in a theihpi maw timi cu Reuters in a nemhnget theilo. Reuters cun SAC ralhraang khal siseh atu Dothlennak ih cozah dingthar (NLD) hnen khalah thusutnak a nei nan letnak an dong lo.

Mipi thlingthlathup tummi idea cu 2019 lam in biakpawhnak lam company hnen ah simtheinak an nei zo ih atak ih tuahsuak ngaingai dingin 2020 lam khan nasaten an nor thok. Asinan lenglam ah thuthup puut suak lo dingin ralrin an pe cia.

Biakpawhnak ceet hmangin mipi thlingthlathup timi hi ramcangkang simlo အာဏာရှင်စနစ် hmangmi ram ṭhenkhat hman in Daan kalh a si titu an um. Nan, Myanmar cu kan ṭhangso caklo tikah Technology Daan kan neimi in a huap ban lo ih tawlreltu Uktu lam cun Daankalhlo phungpha in an fehpi. Myanmar mipi phone call le message tiang zoh thup theih dingmi khuakhannak cu Norway hrambun Telenor in leitlunhuap mipi theih dingin a pholang hmaisabik. Asancu Myanmar rampumhuap biakpawhnak lam customer neitambiktu an si ruangah a si. Mipum 54 million umnak Myanmar ram ah Telenor company in 18 million lenglo customers a nei ih Myanmar ramsung bikpawhnak lam customer neitambiktu company a si.

Telenor in 2020, December 3 ih ca a suah mi ah “Myanmar thuneitu in Mipi a thlingthlathup tummi cu mipi hrangah donhar um zet a si. Biakpawhnak lam Daan thawn milaw in a dotdotten siannak lak ṭulmi a si nan Myanmar ram cun Privacy thawn pehparin customer rights Daan a nei lo. Curuangah uktu lam cun Daankalhlo phungpha in an fehpi” tiah an tarlang. Leitlunhuap ram cangkang tamzet ah misual kai danding olsam thei dingin phone call ngaithuptu le mi message siartheitu cozah an um ko. Nan, an nih cu a ṭha lam in an hmangmi a si hlei ah Daan vekin a dotdotten siannak an lak hnu ah an hmangmi a si.

Kawlram cozah/ralkap in thlingthlanak buntermi operator ah Telenor, MPT, Mytel, Ooredoo le mitamzet hmangmi internet zemsuaktu company lar ṭhenkhat an tel. Cumi thuthawn pehpar in Reuters in Telenor a sut nan “kan hnaṭuantu security hrang ṭihnungmi a si ruangah kan lo sim thei lo” ti`n an let. Culodang company khal an sut nak letsalnak ziang hman an dong lo. Atuah, cumi lakih telve MPT le Mytel cu kumpi cozah thuneihnak latu SAC ralhraang kut sungah a um zo.

“Ralkap in duhtawkin mikeneh an zawt ih mi call an ngai thup”

Boruak thlirtu le ralkap pawl ih Surveillance system hmandan zohliahtu Hram pathum cun ramsung biakpawhnak company le Internet zemsuaktu company zate cu mipi thlingthlanak an tuah fial lo. Hmangtu neitambik company le an mai` hrilhranmi company hnen lawngah mipi thlingthlanak Spyware an bun ter tiah an sim.

Reuters thawn hmaton thusutnak tuahtu hminthup mipakhat cun “SIM cards hnungzul in mi call khal an ngai thup. Phone kan call tikih dial tone awn kan theilo cun in ngai thup tinak a si. Cuvek tongtu siarcawklo an um” a ti. Dothlen duhphorhnak ih kaihkhihtuar pawl buaipitu Daanthiam mipakhat khalin “Ralkap tayacuai tuar kan buaipimi case kan zoh tikah an phone call ngaithup le message kuat mi an zoh thup ti a ciang. Lamzawh duhphorhnak ih kaihkhih tuar miṭhenkhat cu taya an cuai tikah Duhphorhnak thubuai siloin phone hmangin Daankalh cangvaihnak nei dingin cumi khami thawn cutin khatin nan biakaw ti`n tayacuai tuar hmuh ding an tam” a ti. Leitlun ih Human right pawlkom tumbik Amnesty International khalin “Technology lam security thiamsang pawl hmangin duh caan ih zingzoinak nei thei dingin Phone metadata – data pawl an ret ter cia ṭhepṭhi ih zo in zo pawl an call, nazi paziat sung an biakaw, phone ah ziangvek a um tvk khal an zoh thup” tiah an tarlang.

“Internet le Phone Line cable an chat hlei ah Dothlennak ih hruaitu ṭhenkhat Phone an block”

Min Aung Hlaing hohami ralkap in February 1 ih kumpi cozah thuneihnak an la hnu zarhkhatnak hrawngin SAC ralhraang cun rampihuap data center pawl ah fehin Internet cable hri an chat sak. Chat duhlo ruangih kutthlaktuar khal an um ih meithal tin tuar khal an um. Zaan ih Internet an phit thok hnu ni 3-4 hrawngin biakpawhnak company ṭhenkhat cu Dothlennak ih hruaitu phone number pekin an hmanmi SIM cards network block an fial. Cumicu mipi lakah pehtlaihawdan harsa hai seh timi tumtahnak thawn an tuah mi a si.

“Ramsung mipi ih hmanṭangkai zetmi websites ṭhenkhat le social media ṭhenkhat cu Kawlram ah hman theihlo dingin an block thok. Kan company customer pawl ih phone number khal in dil. Cumicu peklo theihlo dingin Daan thar an tuah ruangah pek tengteng a ṭul” tiah biakpawhnak zung ih hnaṭuan mipakhat cun Reuters hnen ah a sim ih “Telenor le Ooredoo khal kan thu nan ngai lo cun licences kan lo lawng ding tiah SAC ralhraang hringhro an tuar” a ti.

SAC ralkap in hitiih mipi thlingthlathup le Internet humreek hmalaknak an nei nasa cu China cozah ukhruaiawkdan cawngin kumrei lal an tum ruangah siding tiah zumnak a um a si.

Hminthup mipakhat cun “SAC ralhraang in an him nakding hrangah Internet control an duh. Cumicu kan hrang ah kum 5 dungtolhsalvek a si” a ti.

Leave a Reply

Your email address will not be published. Required fields are marked *