Min Aung Hlaing kekar tum dan cu a hmel theih Tateshi Higuchi in a relsuak thluh

Ralbawi Min Aung Hlaing hohami ralkap in Myanmar kumpi cozah thuneihnak a la hnu February 1 ihsin tuini April 21 tiangah amah dodaltu a thatmi mipum 1000 an kim zik thlang ih Myanmar ram cu siat lam a pan vivo.

Hitiih, Myanmar ram ṭum suk lam a pan vivo mi thuthawn pehpar in Tokyo Metropolitan Police Department ih superintendent general hlun Tateshi Higuchi cun “a ninii in tlaksiatlam an pan vivo ih ṭhat lam pan thei nak ding lamziin hmuh ding a um cuca lo” a ti.

Tateshi Higuchi cu kum 2014-2018 ah Japan cozah in Myanmar Ambassador hrang ih a rak hmang dahmi palai a si ih Aung San Suu Kyi thawn voitamzet meeting neizotu a si. Ralbawi Min Aung Hlaing thawn khal hmeltheih an si ih thurel tlangnak khal voi 20 lenglo an nei aw zo.

Myanmar ram buainak thawn pehparmi le SAC ralkap in mipi nuaineekdan thuthawn pehpar in “ralkap pawl cun thil dik kan tuah tiah an ruat aw. Cun, hriamhrei ralthuam hmangin duhphorhnak neitu mipi nuaineek baak lo cu ti dan ding lamziin dang an thei lo. Thailand ralkap in an ram cozah thuneihnak an la ṭum 2014 ih cetcangdan an cawng rero nan Khuakhaan Laireldan an thiam lo ih luarkai zetin an cangvai hlei ah an tuahmi ah hlawhtlinnak hmuh ding a um lo” tiah Tateshi Higuchi cun tubaite`h tuahmi Nikkei interview ah a rel.

Luarkai zetin an cangvai a timi cu 88 ṭum ih ralkap cangvaidan thawn khaikhinin a sim fiangmi a si ih amah cun “Khai` ṭum ahcun ralkap pawl hin kawlram ih um Foreigner pawl an dai ngam hrimhrim lo. Nan, tuṭum cu khamri an luan. NLD cozah thawn hnaṭuan tlang Australia rammi khal an kai, Yangon ih American Center innpi khal an kap” a ti.

Tateshi Higuchi cun “Ambassador ka ṭuan lai ah ralbawi Min Aung Hlaing thawn voi 20 lenglo kan tongaw. Thu phunphun kan rel tlang ih rampi hrang tumtahnak tumzet neitu si in ka hmu. Rohingyas thu kan rel khalah ruahnak kau thuruat thiam zet a bang. Rakhine ih thilthleng cu zuk rori khalin in hmuh ih ralkap dinhmun khal cipciar zetin in sim. Nan, tu ah, amah khal siseh ralkap lam khal siseh an thil tuahmi pawl hin hruitu siding an tlak lo zia a langter thluh” a ti.

Myanmar ramsung atufang dinhmun thlir in hmailam thilthleng thei thusutnak an nei mi ah “Ramsung ih cangvaihnak lawng cun ṭhat lam pan thei nak ding lamziin a har. Ralkap lam cun atu an cangvai keel ten an feh rero ding zum a um. Cuhnu ah pursum lam hmalaknak an nei vivo thei ih rampi election hrang tawlrelnak an nei vivo thei.”

“Election hnu, ralkap telmi cozah an dinsuak hnu cun American, Europe le Japan tvk in a zalen mi ram pakhat dinhmun ah in pom thei tiah ruahnak an nei ding zum a um. Cun, election ah an mah lal thei dingin Daw Aung San Suu Kyi le NLD party hi sir ah an hnawl ding. Ram tum deuh pawl in thlun dingih an duh sakmi an thlun lo tikah nasa zetih soiselnak an tong dingih cumi tuar thei dingin le lamziin ong um thei dingin ASEAN mei an pawk ding. An mithmai ṭha co thei dingin ziin phunphun an hawl thei.”

“Nan, tufang Myanmar dinhmun cu ralkap lam in Election tuah ding an ti hman ah remdaihnak a suak thei hmel lo. Ralkap telmi lole ralkap thawn pehtlaih awmi cozah thar cu Myanmar cozah dik dinhmun in leitlunhuap ramdang in an cohlang ding zum a lo nan ralkap lam cun cuvek cozah thar dinsuah ding an beisei” tiah Tateshi Higuchi in a ti.

Tateshi Higuchi cun “thil pakhat um bet theimi cu ram pakhat ukhruainak derthawm ruangih cozahpi tlaksiat hi a si. Ramsung ramleng ṭangtlangin Dothlennak tha a cak vivo cun SAC ralkap 400,000 le palik 700,000 hin mipi an reekbet thei nawnlo ding.”

“Tuhlan ih caan malte sung Democracy rak teeptu Myanmar mipi hin ziangvek dinhmun an thleng khalah ralkap ukhruainak hnuai ih um sal ding cu an duh hrimhrim lo ding. Cun, tlangpar hriamhrei keng pawl khalin SAC ralkap do in an nor vivo ih buainak khal a sosang vivo ding zum a um.”

“Cutin, mipi lam in sir-dung-hmai rorin an nor vivo cun Min Aung Hlaing dungthluntu ralkap tamzet khalin an pu an phat san thei. Cutikah Min Aung Hlaing hin a ke kar dan a thleng thei. Asinak hlit in thuneihnak khal a tansan/bansan thei. Asiabik zawngih kan ruat asile tuhlan vekin Myanmar rampi cu ralkap ukhruainak hnuai ah a tla sal thei ih ramdang thawn pehtleihnak phittuar sanmanlo Myanmar ram ah a suak sal thei” a ti.

Leave a Reply

Your email address will not be published. Required fields are marked *