Min Aung Hlaing in ram hrang a tumtahmi Thu phun 3 relsuak

SAC ralhraangbawi Min Aung Hlaing cun ram hrang a tumtahmi thu 3 pawl cu February 2, Naypyidaw ih meeting an tuah nakah a relsuak.

“Ram hrang tumtahmi 3 ka nei. Pakhatnak cu kan ram pursum tuahnak hi ka khai so ding. Nikum ih kan hmuhtonmi thawn zohkop cun tuah thei lo nak ding san a um lo. 2022 ah rampi pursum tuahnak thacak ko kan tuah ding.”

“Pahnihnak cu party tinkim telmi hrilawknak hi a si ih adikmi hrilawknak cangsuak thei dingin a ṭulmi zinkong phunphun kan hawl ding” ti`n Min Aung Hlaing cun a rel.

Cumi ṭhehin 3nak a si mi kan ram humkhamawknak hrang kan feh pehzom ding. Tahṭhimnak ah rammi tapiang ralkap lut ter tivek kha kan hmang hrih lo. Rammi tapiang cun a ram hrangah pum a pe aw ding hi a si ti`n Min Aung Hlaing cun a rel bet ih “kum 2 maw, kum 3 ti`n boruak ih zirin a si ding” a ti.

Cuhleiah ralhraangbawi Min Aung Hlaing cun hitin a rel bet hrih. “Rampi boruak thawn zirin kan tuah dingmi cu a si. Tuah lo a theih lo. Kan ram humkhamawknak thazaang kan tlasam cun kan mah thotho in kan tuar ding.”

“Pursum tuahnak lam ṭha loin paisa kan nei lo cun mi hmai ah kan tha nau. Naingnganzi a ṭha lo cun mi pawl in buainak phunphun in tuah sak ding. Ralkap thazang a mal cun mi pawl ih hmuhsuam kan tuar ding ih kan Hruang a him lo ding. Curuangah hih thu 3 cu tuah lo theihlo tuah ṭul rorimi a si” tiah a ti.

Min Aung Hlaing hin rammi tapiang ralkap lutterding thu hi tuhlan ah a thlithlam in a rak rel tam zo. Amah cun rampi humvenawknak hrang sivekin a rel nan, politic a tuah dan thei ciangtu pawl cun ralkap thazang an mal tuk thlang ruangah a si sawn ti`n zumnak an nei a si.

Cambodia PM Hun Sen in Ralhraangbawi Min Aung Hlaing a phat san

Siarbet : Cambodia PM Hun Sen in Ralhraangbawi Min Aung Hlaing a phat san

Tuṭum, ASEAN hruaitu a simi Combodia ram cun January thla sung ih a ṭhulh zo mi annual ASEAN foreign ministers meeting cu Feb 16-17 ah tuah dingin a nemhnget.

Cuih meeting ah Cambodia Prime Minister Hun Sen cun SAC ralhraang a sawm tel tum lo tiah sunglam thuthang dongtu rintlak kyodonews cun a tarlang.

SAC ralhraang in ramsung a hraang zawng cangvaihnak a ti tawp cuanglo ruangah hitin thuthluknak a tuah ti a si ih, “ramsung remdaihnak hrang hmalaknak malte tal a um lo cun SAC ralhraang ai ah ramkhelnak thawn pehpar lotu sawm an si ding” tiah an tarlang.

PM Hun Sen thawn naivaitu miṭhenkhat cun SAC ralhraang in ASEAN thusuah a thlun lo ruangah meeting sawm tum lo mi sivekin an rel nan, Combodai ramsung buainak ruangih soiselnak a tam ruangah siseh, Indonesia le Malaysia hruaitu pawl in SAC ralhraang sawmtel an duh lo ruangah PM Hun Sen cun a hnaṭuanpi mithmai zohin le Leitlun mipi mithmai ngah duh ah hivekin thuthluknak a tuahmi a si tiah mithaim pawl cun an rel.

SAC ralhraang hin hnon a tuar nak ASEAN pawlkom ah lut kir saal thei dingin PM Hun Sen cu karbak ah a hmang tum.

Kawlram tlawng dingin SAC ralhraang in a hranten a sawm ih Min Aung Hlaing thawn sangkakhar meeting nak tiang an rak nei dah.

Asinan, atu ah, leitlun mipi mithmai zohin le a hnaṭuanpi pawl nornak zaar ah PM Hun Sen cun annual ASEAN foreign ministers meeting ah SAC ralhraang a sawm tel lo tiah theih a si nan, leh hnu ah a thu ṭhawn saal in meeting a sawm saal khal a si thei.

Leave a Reply

Your email address will not be published. Required fields are marked *