Min Aung Hlaing in MCIS meeting ah Thuphan Tawmtawhlot a rel

Min Aung Hlaing cun Russia ram ih tuahmi Voi 9nak MCIS (Moscow Conference of International Security 2021) meeting ah thuphan tawmtawhlot a va rel.

Leitlunhuap humvenawdading relkhawmnak cu hmai phiah fai nakah hmangin “Derthawng in a ciim cuahcomi Myanmar Democracy cu zuam hramhram in kan runsuakmi a si” ti`n Min Aung Hlaing cun Myanmar rampi ukhruai thuneihnak a la mi cu phuahlam hawlin Leitlun mipi hmai ah thuphan tawmtawhlot a rel.

MCIS meeting hrangah palai thlah thei cingin a mah rori a va tel cu duhsan a nei ding tiah Kawlram boruak rak thlirtu pawl cun an rak rel cia.

Leitlunhuap ram tamsawn cun Kawlram buainak cu SAC ralhraang mawhphurter in hremnak phunphun thawn hmalaknak an nei laifang a siih cuvek boruak ah ṭanpitu kan nei thotho timi langter duh in meeting a va kaimi a si tiah ramkhel thiamsang pawl cun an rak rel cia.

Min Aung Hlaing cu Russia khuapi Moscow ih tuahmi MCIS meeting kai phah in meeting sawmtu Russia Defence Minister Sergey Shoygu thawn khal a hranten thurelnak an nei tlang tiah theih a siih Myanmar hruaitu dinhmun in Russia ram ah a va tlawng nan ropi zetin hmuaknak an tuah sak lo hlei ah Russia President Vladimir Putin khalin a tong hran duhlo tiah theih a si.

Leave a Reply

Your email address will not be published. Required fields are marked *