Meithal thawn Bank luhcilh tu a thlai aw that, Paisa Ting 200 a fir mi teh?

October 15 ih Air gun meithal thawn Bank luhcilhtu cu thlaiawthat in a ruak an sar tiah Mandalay palikzung in October 19 ah ca an suah.

Mandalay ramṭhen, Pyigyidagun khua ih UAB bank ṭhen fate pakhat cu October 15 ni ah meithal keng bike lukhuh khum tu mipakhat in a luhcilh ih Kyats ting 200 lenglo a tlanpi. Motor thawn a tlan ih a motor cu Pyigyidagun khua (ခ) veng ah a to nak urkang cia in an hmusuak.

Mandalay ramṭhen palik thusuah mi vek a si le motor cu licence nei lo mi a si ih motor sungah air gun cerek le phone number ngan mi caphek pakhat a um ti a si.

Phone number an zawt vivo tikah number neitu cu Pyigyidagun, ThinPanKaung veng ih um အောင်ကျော်ထွန်း a si ti an thei ih October 16 zaanlam ihsin palik pawl in အောင်ကျော်ထွန်း umnak inn cu an zoh thup thok.

Ni 17 zing tiang cangvaihnak ziang hman an hmu lo ruangah innsung ah an luhcilh ih အောင်ကျော်ထွန်း nupi lawng a rak um.

Phone number an hmu mi, motor urkang mi cungcang pawl cu a nupi an sut thluh hnu ah အောင်ကျော်ထွန်း neih mi a si ciang timi an theisuak.

Cutin zingzoinak an nei rero lai ah Chanmyathazi khua, meithatzung kiang ah thlaiawthat mi miruak kan hmu timi thuthang an dong ih an va zoh tik ah အောင်ကျော်ထွန်း a si ti an hmusuak.

Mithi ruak cu a ngel ah namte atnak fate a um ti a siih a kiang ih bike um mi toolbox sungah အောင်ကျော်ထွန်း hmin ngan mi မှတ်ပုံတင် copy le အိမ်ထောင်စုဇယား copy khal hmuh tel cih a si ruangah mithi cu UAB bank rob tu အောင်ကျော်ထွန်း a si ti`n namhngetnak an nei.

Palik ih report ahcun mithitu cu meithal thawn UAB bank luhcilhtu အောင်ကျော်ထွန်း a si rori ti`n an ngan nan bank ta a lak mi paisa ting 200 cungcang an ngan tel lo tiah DVB in a ngan.

Leave a Reply

Your email address will not be published. Required fields are marked *