May 2 Dothlenni ah Myanmar ramsung boruak sosang + Video umsun

May 2 Dothlen nipi ah Myanmar pumhuap hmun tamzet ah picang zetin lamzawhnak nei a si ih buaibainak umloten lamzawhsuak an um vekin meithal kappuak ih ṭhenṭhek tuar khal an um.

SAC ralkap/palik kut tuar ih thi le kaihkhih tuar khal an um ih rampumhuap hmun ṭhenkhat ih boruak kan run tar khawm ding.

Shan ram ih Lamzawh mipi ṭhenṭhek tuar

Shan ramṭhen, Nawngchu khua ih lamzawh mipi cu motor thawn pah hai hrim in ralkap le palik in an ṭhenṭhek ih meithal an hmet puak tlun ah kaihkhihmi khal an um tiah theih a si.

May 2, Hpa-An (ဘားအံ) boruak

Kayin ramṭhen, Hpa-An myone, Indus khua ih lamzawhtum mipi cu zinglam nazi 9 hrawng ah SAC ralkap ih ṭhenṭhek an tuar.

Duhphorhnak nei dingin mipi an pungkhawm lai ah ralkap 10 hrawng ih ṭhenṭhek an tuar ih motor cycle 50 lenglo khal an la cih tiah a hmun ih telvetu mipakhat in a sim.

Amahcun “motor pangai thawn an ra ih kan mah lam ṭang ah kan ruat lawk. Sangkate an khar thluh ruangah a sunglam kan hmu theilo. Kan hnen an thlen veten meithal an hmet puak cih ih mipi in ṭhenṭhek. Tutiangcu hliam tuar le kaihkhih tuar an um hrih lo a ti.

Hsipaw (သီပေါ) khua ah mipakhat an kap that

Shan ramṭhen, Hsipaw (သီပေါ) khua ih lamzawh mipi cu SAC ralkap in zingpit ah ṭhenṭhek in kum 20 mi mino pakhat an kap that.

“Kan buai deuh tikah an kap that mi hi zo a si ti kan thei ciang hrih lo. A lu ah an kap ih a hmun rori ah a thi. Inn lam ih kuat dingin kan tawlrel rero” tiah mibawm hnaṭuan mipakhat in a ti.

Hliam tuar 1 le kaihkhih tuar 10 luan an um ih khuasung hmun tamzet ah nasaten ralkap an duty.

မြင်းကကုန်း khua ah mi an kai

Irrawaddy ramṭhen, Bokalay myo, မြင်းကကုန်း khua ah tuhlan lamzawh duhphorhnak ih teltu mipi hawl in SAC ralkap nasaten an cangvai.

SAC ralkap ih hnaṭuan pekmi khuabawi roriin mi ṭhenkhat warrant suahin ralkap a kai ter ih zinglam nazi 5 hrawngah mi inn siim in inn khat hnu inn khat an lut vivo.

မြင်းကကုန်း khua ah ဒလန် hnih-thum an um ruangah mipi lamzawh ngam loih an umnak a rei thlang. Cuticingin tuhlan lamzawhnak ih rak teldah pawl cu May 2 ah inn khat hnu inn khat lut vivo in kaihkhih an tum ih pukmah 505 thawn thubuai tuah tuar le lamzawhnak ih tel dahlo pawl khal an kai tiah khuami in an sim.

Wetlet (ဝက်လက်) ah mi 2 kap that

Sagaing ramṭhen, Shwebo District, Wetlet ih lamzawhtum mipi hngakaw lai cu SAC ralkap in an ṭhenṭhek ih mipahnih an kap that.

“Zinglam nazi 8 hrawngin in kap thok. Hmasa ah rubber cerek thawn in kap ih mipi kan zaam theilo ruangah cerek ngai an hmang” tiah khuami pakhat in a sim.

SAC ralkap kut tuar in a hmun rori ih thi cih, kum 22 mi Ko Min Zin cu ralkap pawl in a ruak an la cih. Kum 24 mi mipakhat cu Siizung an kuat tum ah a nunnak a cem.

Kanyutkwin ih lamzawh mipi ṭhenṭhek tuar

Bago ramṭhen, Phyu (ဖြူး) myone, Kanyutkwin ih lamzawh mipi cu ralkap ih ṭhenṭhek an tuar nan ပြောက်ကျားစနစ် hmangin an cangvai ruangah zohman an kai man lo.

Myataung ah mi 4 an kai

Mandalay ramṭhen, Chanayethazan Township (ချမ်းအေးသာစံမြို့နယ်), Myataung ih lamzawhtum mipi ṭhenṭhek an tuar ih ralkap le palik mi 4 an kai.

Hpakan (ဖားကန့်) ah mipakhat an kap that

Kachin ramṭhen, Hpakan (ဖားကန့်) ih lamzawh mipi cu zinglam nazi 9 hrawngah ralkap le palik in an ṭhenṭhek ih kum 33 mi mipakhat an kap that.

Hmunhnih in lam an zawh ih a pahnih rorin an ṭhenṭhek. Hliam tuar 4 an um ih kaihkhihmi 10 an luan. Ṭumṭum hi Hpakan (ဖားကန့်) lamzawh mipi voithum an kap nak a si.

Myitkyina (မြစ်ကြီးနား) boruak

Kachin ramṭhen, Myitkyina lamzawh mipi cu ralkap le palik in voihnih rori an ṭhenṭhek nan kaihkhihmi umloin an ṭhehsuak thei.

Mandalay boruak

Mandalay hmun tamzet ah uniform hruhlo ralkap le palik nasaten an cangvai ih Lamzawh mipi ṭhenṭhek in meithal khal an hmet puak.

Motor 15 hrawng thawn khuasung vengtin ah an vak ih ralkap kut tuar ih hliamhma tuar amalbik 4 an um tiah theih a si ih kaihkhih tuar 10 hrawng an um.

Hminsin : boruak umdan ih zirin kan run peh vivo ding

Leave a Reply

Your email address will not be published. Required fields are marked *