Mandalay : Zaan thim hnu ah Palik an cangvai ih Meithal voi 50 hrawng hmet puak

February 17, zaan nazi 8 hrawngah Mandalay palik in CDM ih telvetu tlangleng zung hnatuan pawl umnak hmun an siim ih meithal zuun 50 hrawng an hmet puak tiah theih a si.

“Palik an ra ti kan theiveten bungbel khukheng kan tum ciamco. Cuhnu ah palik in a kaankaan in meithal voi 50 hrawng an hmet puak. Hliamaw cu an um ti`n kan thei ih mithi um le umlo cu tuhrihtiang kan thei hrih lo” tiah tlangleng zung hnatuan pawl umnak kiang ih umtu mipakhat in MND media hnen ah a sim.

Mandalay tlangleng zung ih hnaṭuan tamsawn cu ralkap uknak do in CDM cangviahnak ah an tel ih, hnaṭuan an cawlh mi hin rampi sumher a ti cingpeng ti`n ralkap cozah in hnaṭuan ṭan sal dingin nasazetin an nawr a si.

Ralkap cozah in athu le hla zawng in an nawr theilo ruangah tuvekin hriamhrei/meithal hmangin Mandalay palik pawl an cangvaiter mi a si.

Hih thuthawn pehpar in hminphuang duhlo, Mandalay ih um mipakhat in “Suun ahcun mipi in kan kil ṭhepṭhep ih duhvekin palik pawl an cangvai ngam lo. Nan, thim hnu ih cangvaiṭhang an si ih kan zum vekin zaan ah an ra pan ngaingai.”

“Palik an ra ti kan thei veten ralrin pekawknak ah ti`n bungbel khukheng kan tum ciamco. Culaitakah palik in a kaankaan in meithal an kap ciamco cu ṭihkhur phah in mitamsawn cu a him nak hmun ah kan relh thluh” a ti.

Mandalay tlangleng zung kiang 34/35 ziinkar ih meithal kappuaknak ah hriamhma tuar cu an um nan mithi an um le umlo cu theih fiang a si hrih lo ih kaihkhih tuar an um le umlo timi khal thu felfai a suak hrih lo.(MND)

Leave a Reply

Your email address will not be published. Required fields are marked *