Mandalay palik le ralkap in Duhphorhnak neitu mipahnih kap that

Mandalay, ကမ်းနားလမ်း ih duhphorhnak neitu mibur cu palik le ralkap in February 20 zinglam ihsin an buai hnawh ih mipi ṭhekdarh tumin meithal an hmetpuak nakah mipahnih an thi tiah theih a si.

Thuthang suak netabik tiangah Mipum 20 luan in hliamhma an tuar tiah theih a siih mipahnih an thi. Mithi ruak pahnih cu မြတ်ပါရမီသွေးလှူရှင် pawlkom in Siizung lam ah zoh ciangnak nei bet dingin an phur zo.

“Tuhrihtiang ah mipahnih an thi zo. Pakhat cu a hmun rori ah a thi ih pakhat sawn cu siikhaan an panpi lai ah a thi. Mipa veve an si.”

“Tukhalah palik le ralkap in meithal an kap rero. Ramsung Media palai pawl khal kiangkap naivai inn pawl ah an relh thluh” tiah thuthang zingzoitu mipakhat in zaanlam nazi 6 kimzik ah Myanmar Now hnen ah asim.

Mandalay ih Ti par cozah hnaṭuan pawl cu CDM cangvaihnak ah an tel thluh ih Lawng mawngtu khal an um lo ruangah ralkap pawl cun khua dang mi hmangin February 20 ah hna an ṭuanter thok tum.

Cumi dodal in mipi lam in duhphorhnak an nei ruangah tuvekin palik le ralkap in an buai hnawh mi a si.

Ministry of Transport and Communications cozah hnuai ih hnaṭuan mipakhat cun “atu Lawng par ih hnaṭuan pawl hi Mandalay ih cozah hnaṭuan an si lo. Kan nih Mandalay ရေကြောင်း hnaṭuan pawl cu CDM ah kan tel thluh” a ti.

Cozah lam in hramhram in hnaṭuan an thok tum thotho ruangah Mandalay mipi in duhphorhnak an nei mi a siih cuih mibur ṭhekdarh dingin February 20, sun lai hrawng ah palik le ralkap mawṭaw 20 hrawng an thleng.

Mipi lam cun ralṭha zetin dung an sip tum cuanglo ruangah palik le ralkap in zaanlam nazi 4 hrawngin meithal hmang in duhphorhnak neitu an kap ciamco ruangah minung 20 luan in hliamhma an tuar ih mipahnih an thi a si.

Leave a Reply

Your email address will not be published. Required fields are marked *