Mandalay ih mithi cu a “Lei” a keu ih a thi tiah Ralkap in record an ngan

March 11, Mandalay, Mya Taung lamzawh duhphorhnak ih lu hliamhma thawn nunnak liam mipakhat cu Lei keu ruangih thi tiah ngankhum dingin ralkap lam in record an tuahter.

A thih dan ngankhum dingih an tawlrel lai fang video tawi cu Myanmar Now in a zoh ngah ciangih video sungih a lang dan pawl cu Myanmar now in hitin a ngan sal.

“Myanmar now in video tawi kan zoh mi ahcun thi le hnai lakih nunnak cemzo mino pakhat kiangah thuamhnaw pangai hruktu mipakhat a to ih ralkap pawl in mithi pai` taksa par ih hliamhma an hawl ter”.

“Ralkap pakhat cun miruak cu ṭhiṭha khalin zoh cuang loin ‘thil sit ngah in bokkhup in a bah siding’ a ti”

“Cuveten miruak zohciangtu cun ‘a Lei a keu ngah hmel’ a tiih ralkap pakhat cun ‘Lei keu ngah si hlah ee, a thi suak kan hmu cun thil a sit ngah ruangah zapathal in a tluk tiknak si’ a ti”.

“Miruak zohfeltu cun ‘sayapa zapathal in cu a tluk lo’ a ti ih ralkap pawl cun ataksa ah meithal kap nak umle umlo an hawl ter. Dunghmai letin a zoh ciang hnu ah ‘zianghman a um lo sayapa’ a ti”.

“Cuveten ralkap pakhat cun ‘a tlan ciamco ih bawkkhup in a bah. Cule a Lei a keu ngah. Adik tiaw. Adik ciang. Cutin ngan khum aw. cutin record tuah aw” a ti tiah miruak an check lai video tawi zohngahtu Myanmar Now cun a ngan.

Tuizing, March 11, Mandalay ramṭhen Mya Taung lamzawh duhphorhnak ah hin ralkap/palik pawl in meithal zuun 12 hnak ih tam an kap puak. Cumi ah tlunlam ih kan tarlangmi mino cu a nunnak a liam ih hliamhma tuar dang khal an um.

Ralkap pawl in mino pai` ruak an lak lai hmutu, a Ke ih an kap ngah vemi ဦးထက်တေဇာအောင် cun “meithal zuun 12 hrawng an kap ih mitthli tlak bomb khal an puah. Ka hmai ih mino pakhat cu a tluk nan ka Ke ah hliam ka tuar ve ruangah ka run theilo. A ruak cu ralkap pawl in an lak” a ti.

Kawl Ralkap in kumpi cozah thuneihnak a la hnu February 1 ihsin tuisun tiangah Mandalay ih Ralkap/palik kut tuar ruangih thi mipum 14 lai an um zo a si.

Leave a Reply

Your email address will not be published. Required fields are marked *