Mandalay Buainak thu ah Singapore cozah ṬongSuak

“Myanmar Ralkap cozah in remdai zetih duhphorhnak neitu mipi pawl meithal thawn a kap ciamco cu ngaithiamtheih a si lo” ti`n February 20, Mandalay buainak thu ah Singapore’s Ministry of Foreign Affairs (MFA) in Kawl ralkap pawl a dem hai.

February 20 ah ralkap ukhruainak dodal in le CDM thawn pehpar in Mandalay, ကမ်းနားလမ်း Lawng mual ih duhphorhnak neitu mipi cu ralkap le palik in ṭhekdarh tum in cereknung, rubber cerek le mitthlitlak bomb thawn an naui ih minung 30 luan hliamhma tuar in mipahnih an thi.

Mandalay ih buainak thuthawn pehpar in Singapore’s Ministry of Foreign Affairs ṭuanvonei mipakhat cun “Hliamhmatuar, mithi um lo dingin le remdaihnak um thei dingin ṭuanvonei pawl in hmalaknak an nei lohli a ṭul”.

“Party tintian khalin ramsung ah remdaihnak umsal dingin lamzin an hawl ṭul ih thihnaisuak le a hrang zawng siloin lam tluangmi uknak hlanawk danding khal an tawlrel a ṭul a si” tiah CBD hnen ah a sim ih “cuti a si lo le rampi hrang ih a rah suah dingmi hi a duh um lo zet ding” a ti.

Myanmar ramsung buainak a sosang vivo ruangah Singapore Ministry of Foreign Affairs cun Myanmar ram ih um a mipi pawl a seherh zetih khualtlawng sukso lo dingin le mahle umnak inn cio ah him thei bikih um cio dingin thuthannak a nei.

Singapore ram hi UN pi rorelnak ah February 1 ih rampi thuneihnak latu Kawl ralkap hi hremlo dingih vote thlaktu ah a tel ve. Nan, netahnu in ralkap ukawknak dem deuh vekin leitlun ramtin hmai ah a ṭongsuak leh.

Cumi thu ah ruahnak phunphun a suak ih Maynmar mipi tamsawn cun Leitlun rampi cang pawl ih dem ding a ṭih ruangah a mawinak men in an ṭongmi a si tiah an zum a si.

Leave a Reply

Your email address will not be published. Required fields are marked *