Mandalay Ṭek tlak ah Khawmi 7 an thi

Tuzarh sung lawng ah Mandalay ramṭhen, khua 2 pawl ah Ṭek in khawmi 7 a tla that.

May 23 le 24 ah Mandalay ramṭhen, Pyawbwe myone le Singu myone pawl ah Ṭek tlak that tuar mi 7 an um ih, kandung May 17 khalah Wan Dwin peng ah mipakhat Ṭek in a tla that.

Kawlram ah Furpi ṭan zik hrawng le a tawp lam ah Ṭek tlak a tam cuang ih zirzoitu pawl hmuhsuahmi ah sun nazi 12 ihsin zaanlam nazi 6 karlak hrawngah Ṭek tlak a tam cuang ti a si.

Nikhuasia Ṭek tlak tikih humkhamawk dan le theih ṭul mi

Leitlun boruak thleng danglam ah Kawlram khalah kum khat hnu kum khat Ṭek tlak tuar an tam vivo. Ralhraang SAC ralkap in rampi ukhruai thuneihnak a la hlan, NLD cozah san lai ihsin nikhua tahzung lam in mipi ralrin an pe rero zo ih, Mithiam pawl in nikhuasia Ṭek tlak tikih humhimawkdan ṭhabik an ti mi le theih ṭulmi ṭhenkhat cu hnuailam ah a sangsangten kan tarlang a si.

1. Ṭek tlak tuar tam sawn cu mualpi lole hmunrawn Lo thlo lai siseh, ti kholh lai, radio ngai lai, innsung ah phone thawn internet hmang lai, thingkung tang ih beu lai tipawl ah an si tlangpi.

2. Hmun sang ah a tla duh cuang ruangah mualpi lole Lo thlo lai tivek a si le Lei ah bok lohli ding.

3. Thingkung umnak a si le a niam deuh mi hnuai ah beu ding. Nan, a hnge tamtuk lomi Thingkung hnuai ah beu thei le a ṭha. A hnge um lo mi khal hrial a ṭul.

4. Innsung ah a si le sangka, sangkate tivek ihsin a lut thei ruangah sangka kiangkap ih um hril ding.

5. Meisa ciocio an kopaw/thlunaw thei ruangah a cang thei cun electric thawn pehparmi thilri pawl cu plug rorin phong thei seh la a ṭha.

6. Bualrawn, mualpi tvk… hmunruak kaupi le Tlangkolh tivek ah um lo ding.

7. Beu nakding hmun a um lo le olaiten bat theihlo dingin kun phah in ke hnih cip, khuk ah kut ret le Lu kun in um ding.

8. Tipar ah na um le zamrang thei tawkin hmunro lole tikap ah tlan zangzang aw. Tipi kap tivek ah na um khalle hmun him ah zamrangten tlan aw.

Leave a Reply

Your email address will not be published. Required fields are marked *