MAH le a ho pawl cetcangdan thu ah US cozahpi a sup aw thei nawn lo

Ralhraangbawi Min Aung Hlaing le a ho pawl ih mipi sawisadan cu a tawpkhawk a thleng thlang tiah ruah a si ih, sual a tuahtu pawl hrem lohli an si thei nak dingah US cozah in a hnaṭuan a nawt ding thu, US foreign minister Antony J. Blinken in a rel.

Antony J. Blinken cun Kayah ramkulh, Hpruso peng ih Save the Children hnaṭuan mipahnih telin mawh neilo mipi 35 luan an urkaang thatmi thu ah SAC ralkap pawl an dem thu a rel ih “Kawl ralkap pawl hrem lohli thei dingin leitlun ramdang pawl thawn hmalaknak kan nei rero mi cu a tharin kan nawt ding” tiah a ti.

Cuihtlunah ralhraang pawl in tuvekin duhtawkih mipi an soisami hin hrem luat ih an um theinak titawp a cuu thlang zia a tilang sinsin tiah amahcun a rel bet.

Kawlram a buai hnu, tukum thok lam ihsin US cozah hin pursumnak thawn pehpar in ralhraang pawl a hrem rero zo ih, cuvek ṭhiamṭhiam in ramdang cozah pawl khalin mihring zawnruatawknak neiin hmalaknak nei vivo uh si tiah Antony J. Blinken cun a rel a si.

Leave a Reply

Your email address will not be published. Required fields are marked *