MaanLi khuate ah Inn 40 lenglo Kaang ziamral, Urkaangtu an theilo

Saklam Shanram, Namtu myone, MaanLi khuate ih inn 40 lenglo cu zo a si ti theilomi in May 2 ah an urkang sak.

MaanLi khuami pawl cu raltlan dinhmun in Thibaw khua lam ah an beu thluh ih, May 3 ah khua lam pan ih an kir sal cu inn 40 lenglo a ziamral mi an hmusuak.

Khuami mipakhat cun “May 1 ah khua kiang in meithal puak thawm kan thei ih cuih ni ah inn 5 a kang. May 2 ah cu thawmvang dang a um lo. May 3 ah kan khua kan va haal cu inn 40 lenglo a rak ziamralmi kan hmu suak” tiah RFA hnen ah a sim ih “kapawnak le bomb tivek ruangih kangmi a banglo. Mi pakhatkhat ih urkang hrim mi si in a lang” a ti.

Namtu peng sung ih khuate ṭhenkhat ah April thla thok hrawngin RCSS (ရှမ်းပြည်ပြန်လည်ထူထောင်ရေးကောင်စီ), TNLA (တအာင်းအမျိုးသား လွတ်မြောက်ရေးအဖွဲ့) le SSPP (ရှမ်းပြည်တိုးတက်ရေးပါတီ) pawl hmunram cuhaw in an kapaw ih April 6 ah MaanLi khua pawl cu Thibaw khua lam ah beunak hawl dingin RCSS in an sim thei.

Cuhnuin MaanLi khua ah inn 3 a kang thok ih May 1 ah inn 4, May 2 ah inn 40 lenglo a kang bet ti`n MaanLi khuami Ko Sai in RFA hnen ah a sim.

April thla ih an kapaw hnu in Namtu peng sung ih khuate ṭhenkhat ah inn 100 lenglo a kangral zo ih kiangkap khuami 2000 hrawng cu raltlan dinhmun in Thibaw le Namtu Myo pawl ah an beu.

Innkangmi zate deuh thaw in တအာင်း/ပလောင် miphun pawl ih inn a si tiah raltlan bawmtu rinsantlak pawlkom ṭhenkhat in an sim ih, Innkang thu ah TNLA cun an mai` urkangmi a si lo thu an phuang nan RCSS lam cu pehtlaih theih loin an um. (RFA)

Leave a Reply

Your email address will not be published. Required fields are marked *