Kyat Ting 20 hlawh ding vek ih Bumawknak kan ralring a ṭul

Harsatnak phunphun tuarin thinhar vangsang ih kan um lai fang hi bum kan ol bik ti a si ih, kan ram a buai lai fang, mipi thinhar vansang ih an um lai cu caan ṭha ah lakin online ihsin bumawknak tamzet a um.

Tukhalah thlakhat kyat ting 20 hrawng hlawh ding tiih bumtuartu hminthup mino pakhat cun tubai ih a hmuh ton mi cipciar in a rel suak a si.

Amahcun “Myawaddy myo, gate 25 Online Casino ah mirang ṭong mal lai le computer basic thiam pawl hrangah Thai bath 27000 hawlh dingin hnaṭuan a um ti`n in sim.”

“Hnaṭuan ka lut veten ni 12 sung Q in lutter. Q ka lut veten hnaṭuan thu thawn pehparin ca par ah hmin in khenter.”

“Harsat lai thinhar thawn contact hrang hmin in khenter mi cu a thuhla ziang thei ciang loin hmin ka khen ih, ni 12 Q ka lut ṭheh veten natnak nei maw nei lo in ceek.”

“Hnaṭuan ka lut pek ah Online game hrangah in ti. Nan, atak ahcu Whatsapp thawn mi bum lam pang a rak si. Hna ka ṭuan thok ni ah IG account in tuahter ih IG hmangtu fala mawi zuk pawl hawlterin mi in bumter. Account ka ong hnu ni 3nak hrawngin mi bum ding in hawlter ṭan.”

“Ni khat ah mi bum ding 5 in hawlter. Mi 5 kan hmu thei lo cun overtime in ṭuanter. Mi kan hmu a si le in bumter. Paisa kan bum thei lo cun thla hlawh kan lo cut ding in ti.”

“Zaan nazi 11 ihsin zinglam nazi 11 tiang in ṭuanter ih colh caan nazi 2 in pe. Hih hna hi kan dung November 2 ihsin ka lut ih ziang thuhla hman sim loin ni 26 ah hna in ban.”

“Thuhla zianghman um lo in hna in ban hlei ah Baht 10,000 in cawh. Cawhkuan pek lo cun innleng suak loin phone lak sak kan si ding hlei ah thawng tlak bangin in khum tum.”

“Hnaṭuan ban mi hi kei mah lawng ka si lo. Mipa nunau 18 kan si ih kei mah vek cekci in an hringhro ve.”

“Hnaṭuan in ban hlei ah cawhkuan in dil ruangah hna kan ṭuanpi nunau pakhat in hriamkai pawlkom hotu pakhat hnen ah bomnak a dil. Cupawlin in biak sak ih, an biakawk hnu nazi 3 rei hrawngah in thlah saal” tiah a ti.

Bum tuartu mino rel dan ah an hnaṭuannak hi taluk hnen ah a si ih, mino dang in hivek an tong pang ding ka phang ruangah ka relsuak mi a si a ti.

Amahcun “Taluk kut sungin in runsuaktu pawlkom hnen ah siseh, bomnak diltu kan rualnu hnen khalah lungawinak simcawklo kan nei” a ti.

Zuk : Hnaṭuan an ban mi mino pawl thu an rel khawm lai …..

#မြဝတီမဲဆောက်မီဒီယာ

Leave a Reply

Your email address will not be published. Required fields are marked *