Kum 7 nute an kap that dan cipciar an relsuak sal cu Tuar a har tuk rori

Khin Myo Chit cu kum 7 mi nauhak a siih ralkap pawl in an innsung rori ah an kap that. A pa in a pom lai ah a zaang lam in an kap ih a pum lam tiang a vung tlang lan.

Athih dan le ralkap pawl cangvaih dan thuhla cipciar cu Khin Myo Chit unu in a relsuak thluh sal.

“March 23 zaan lam nazi 3 le khuai luan hrawng ah a si.”

“Mandalay, AungPinLey veng ih kan inn ziin ah bike a rualrual in an ruang lut. Bike pakhat ah ralkap 3 cio an to ih an dung ah motor 20 lenglo in an thlun hai. Ralkap pawl cu minung 5-6 cio hrawng in an ṭhekaw ih kan veng inn tin ah an lut. Sangka an pal ih ‘inn ong uh, inn ong uh’ tiah an au phah. Kan inn sangka khal an run sit ih inn sung ah an lut. Ka nu le upa pawl an ding tum ciah ah ‘ding hlah uh, daiten um uh’ ti`n an au ih meithal thawn an tin.”

“Kan sungten zial ah dai ziarzi ten kan to. Kum 7 mi ka nau Khin Myo Chit cu a thinphang tukih ṭap phah in ka pa a pom. Ka pa khalin fek zetin a pom ve.”

“Inn ih um hizet lawng maw nan si tiah ralkap pawl cun in sut ih ‘kan zaten si ko’ tiah ka pa in ṭih phah cing in a sim hai. An zumlo ruangah inn sung an cawklet ih kan sangkate pawl khal an ong ih an bih ciamco”

“Kan inn ih um kan innsang cu hi zet lawng kan si sayapa tiah ka pa in a sim hai. Cuih ralkap pa cu a mitmu a sen ṭheh. Asung ah khuavang lut dingmi khi a bang. Acetcang dan a hrang tukih umngaihnak thei loin kan ṭih kan khur.”

“Ralkap pa cun Putar pa thuphan na sim a ti ih ka nau Kyaw Lin Naing cu a vun hnuk. Ka nau cu kum 19 mi a si. Culai ah kum 7 mi ka nau Khin Myo Chit cun papa ka ṭih tuk, ka ṭih tuk a ti ih ka pa ṭang sung um cingin ka pa cu fek zetin a pom. Ka pa cun ‘ṭih hlah aw ka fanute’ a ti. Culai ah ka naupa cu a duhlo cingin an hnuk. Ka pa le nau a pom phah thawn a cangvai thei lo.”

“Cufang ah ‘putar pa thuphan na sim’ ti`n ralkap pa in a hro ih ka pai` pom mi ka naunu cu a kap cih.”

Ralkap pawl in Islam biaknak bemi Kum 7 nute Khin Myo Chit an kap that dan cu a unu in a sim sal mi a si.

Ralkap pawl cun kum 19 mi Kyaw Naing Lin cu an hnuk ih an vuak an thawi bet ah meithal tawkawng thawn an sut ciamco.

“Ka nau an ṭhuat nasatuk ruangah a lu le a ka ih thisen suak mi cu a turu tuk. Cucing in kan inn ihsin a hnuk rorin an hnuk. Khatlamah kan naute ngaih ven ah ka naupa cu khawilam ah an hruai ih ziang a cang tikhal kan thei lo” tiah a unu cun a sim.

Ralkap pawl cun an suak san hlan ah an innsang zaten an sit ciamco ta ih phun 4 kai lai mi nauhak khal hlah loin ralkap kedam rori thawn an sit ta a si.

Ralkap pawl cun Kyaw Naing Lin lawng siloin an veng ih tleirawl hmuahhmuah cu an vuak an thawi hlei ah an kai thluh. Tlairawl rual minung 10-15 karlak hrawng an kai. Ralkap motor ih an khum lai cu an hmu hai nan inn hmai ih suak ngamtu an um lo ruangah an kai mi zat theihcian a si lo.

Ralkap pawl cun an kah ngah mi naute khal an dil ih “nau hruai aw la inntang ah rak suk aw” tiah an ti.

Culai ah veng sung ih an kai mi tlairawl ṭhenkhat cu himnak hawl in an tlan suak ih ralkap pawl cun meithal thawn an kap ciamco. Kut le Ke ih hliam tuar khal an um.

Kan dung nithum sung hrawng khan Mandalay Myotit, AungPinley, MyahNandar le MaNawHaaYi veng ih duhphorhnak neitu mipi pawl cu ralkap lam in nasaten an ṭhekdarh ter ih mithi khal an tamzet. Atui AungPinley veng an luhhnawh mi khal hi ral nawr hmalak cangvaihnak a si thei. Ralkap pawl ih tumtahmi cu veng sung ih um mino cakvak deuh pawl hi inn khat hnu inn khat kaih vivo an tum mi si in a lang.

Veng sung ih mino rual tlansuak mi dawi in meithal thawn an kap lai fang cu caan ṭha ah laak in Khin Myo Chit ih pa cun a fanu cu Siizung lam pan in a tlanpi. Nan, kum 7 mi Khin Myo Chit cu hliamhma tuarlo in lam lailak ah a nunnak a cem.

Siizung lam ih Khin Myo Chit rak tuamhlawm tumtu Doctor pawl cun Facebook cahmai ah hitin an ngan.

“ခွဲစိတ်ဆရာဝန် dinhmun in a voihnihnak ka mitthli tlak ni.

Kum 7 mi nauhak rori hivek ih tuahtu cu ziangvek thinlung a nei si pei. Inn sung ih ummen naute rori zangfahnak nei lo ih kap that thei cu mihring lungthin neilo an si. Nunnak cem zo nauhak ka hnen ih a ra thlen cu mi rura tumruh tiih ruahmi kei rori hman mihmai ah mitthli tlaklo dingin ka sup aw tum nan a theih thlawt lo hi a si bik. Ka hlawh tling lo.” (BBC)

Leave a Reply

Your email address will not be published. Required fields are marked *