Korea ta cah mi Covid 19 Test Kit ṭha cii Thaizing in hmang thok thlang ding

Korea ram ta Covid 19 nei le neilo zoh nak Test Kit Ting 2 cah mi cu Myanmar ram ah a thleng thluh zo ih September 29, thaizing in hmanthok a si thlang ding ti`n rampi thuron Daw Aung San Suu Kyi in online ah a sim.

Test Kit hin Covid 19 nei le neilo minute 15 sung ah a lang ter thei ih WHO in a ṭha tiih nam hnget zo mi hmanrua a si.

Test kit cu Ting 2 lawng a si hrih tik ah rampi huap zawng cun kan co ṭheh lo dingih Covid 19 nat phungpha vekih nuamsamlo rinhleh um deuh test nak, Covid 19 mina thawn hnuaihnihawknak neitu le nat karhzai bik nak hmun pawl ah hman a si ding.

Hih thu thawn pehpar in rampi Covid 19 dokhamnak zung ṭuanvonei Dr. Khin Khin Kyi cun, “Antigen Test Kit hin Covid 19 nat nei mi cu zaṭek 80 tiang a hmu thei. Nat nei lo mi khal zaṭek 97 in 99% tiang dik in a lang ter thei. WHO ih certified zo mi a siih mina kiang ah olsamten test theih a si. Nan, a test tu cu PPE famkim in a thuamaw ṭul ih Test Kit ah minute 15 in 30 karlak sung ah test result a lang ding” ti`n Duwun media hnen ah a sim.

Antigen Test kit cu Myanmar cozah in Korea ram ta a lei mi si ih Korea cozah lam khal in kan ram hrang ah Test kit $500k man a hlu. Cupawl cu abik in Rakhine ramkulh le nat karhzai cuang nak Myone siizung pawl ah hman a si ding ti`n rampi thuron Daw Aung San Suu Kyi in September 26 zaan ah a sim.

Myanmar ram Harhdamnak le Lehpannak zung in 2020 september 28, zaan nazi 8:00 ih thu a than mi ah ramsung mina 11631 an um zo ti a si ih, a tu, Test Kit thleng thar mi kan hmang thok cun nat nei tu khal an hmu thei lohli ding ih hmun hran ah an tuamhlawm thei lohli ding ruangah kan rampi a dam vivo ding ti`n beisei ngam a um deuh thlang a si.

Leave a Reply

Your email address will not be published. Required fields are marked *