Ko Jimmy le Phyo Zayar Thaw thlai that an si timi thu ah Thawngtla kiltui` Annka

Ko Jimmy le Phyo Zayar Thaw telin ralhraang thih daan tat mi Thawngtlak 4 pawl cu June 16 zinglam ah thlai that an si ding tiah thuthang a suak nan Prisons Department spokesman U Khin Shew cun cuvek thupeknak zianghman kan dong lo a ti.

Myanmar Now thusut sanglet nakah cutin a rel mi a si ih “kan hnen ah thu zianghman a thleng lo. Theihternak tivek khal zianghman in tuah lo ih thupeknak zianghman a um lo” tiah a ti.

Asinan, Ko Jimmy le Phyo Zayar Thaw cu atufang khawi hmun ah an ret ti ka thei lo a ti.

Ko Jimmy le Phyo Zayar Thaw thlai that an si ding timi thu hi June 15 zaanṭim hrawngin online ah a darh nasa ih zianglam nazi 4 ah Innsein Thawnginn ah an thlai that ding ti`n thuthang a suak.

Insein Thawnginn ih lutsuak ṭheutu lawyer pakhat khalin “zingpit ah Ko Jimmy le Phyo Zayar Thaw thlai that an si ding ti`n Thawngtlak pawl relmi ka thei” tiah a ti.

Himi thu ah hmuh dan phunphun a suak ih “mipi ti re thei duh ah thuthang diklo an darhter hrim” titu an um bangin “an that taktak nan thu an thup hrim a si thei” titu an um ve thung.

88 Tlawngta hruaitu Ko Jimmy le NLD palaihlun Phyo Zayar Thaw thih daan an tat thu cu tu thla thok ah ralhraang ralkap in an nemhnget.

Himi thu hin leitlun kilkip a khawng ban ih, ralhraang ralkap nasaten an dem nan, June 7 ah ralhraang thuphuangtu Zaw Min Tun in thlai that an si ding ti`n a rel bet. Asinan, thuhla cipciar zianghman a rel tel lo.

UN palai U Kyaw Moe Tun relvek a si le rampi a buai hnu ah ralhraang ralkap in damsung Thawngtlak dingih daan a tat mi le thih daan tat mi mipum 200 hrawng an um zo.

Original Post ………. 16 June, 12 AM

Original Post ………. 16 June, 12 AM : Ralhraang ralkap in thih daan a tat mi Ko Jimmy le Phyo Zayar Thaw cu tuni June 16 zinglam nazi 4 ah thlai that an si ding ti`n thuthang a suak.

Than Lwin Times khalin Insein Thawnginn thawn naivaitu mipakhat hnen ihsin thuthang felfai kan dong tiah a tarlang.

Zobik hnen ihsin thuthang an dong ti cu tarlang a si lo nan “thu dik a si. Tu dinhmun ahcu hi zat lawng ka rel thei. Sim bet ding a rem thiam lo” tiih a relmi khal an tarlang tel cih.

Hih thuthawn pehpar in thuhla felfai nemhnget duh ah Than Lwin Times in Insein Thawnginn a pehtlaih nan let nak zianghman an dong lo.

Hih thu hi a dik rori titu an um bangin khawsung ih umthup mipi ralkap pawl thinheng dingin thu an tuah hrim ih ralhraang ralkap Thangkamnak men a si titu khal an um ve.

Dothlengnak thapetu upa ṭhenkhat khalin himi boruak ah cangvaihnak ziang hman tuah hrih lo dingin mipi hnen ah forhfialnak an nei a si.

Leave a Reply

Your email address will not be published. Required fields are marked *