KNU in Thailand ramri ih Ralkap buuk an siim cu Ui le Ar tlan bangin SAC ralkap ṭhenkhat an tlan hlo

Karen National Union hmunram a si mi Thailand border ih သောလယ်ထာ့ (မဲ့စန်လက်) SAC ralkap buuk cu April 27 zingthlapit ah KNLA ralkap in an siim ih caan reilo sung, zingpit nazi 6 hrawng ah an lasuak thei.

Cumi thu cu KNU ṭuanvonei Padoh Saw Taw Nee in Reuters hnen ah felfai zetin a sim thei ih mithi umzat le SAC ralkap kaingahmi cazin kan zohciang rero lai a ti.

Karen Information Center le local media ṭhenkhat khalin Karen National Union ralkap branch pakhat a simi Karen National Liberation Army in Thailand border ih SAC ralkap buuk an siim thu an tarlang ih ralkap ṭhenkhat cu Ui le Ar tlan in hramlak ah an tlan hlo tiah an tarlang.

Thailand rallam ih um khuami pakhat in “zingpit khuavang zik nazi 2 sung hrawng ah an lasuak thei. Ralkap buuk an urkang mi khal kan rak hmu. Cun, ralkap ṭhenkhal hramlak ih an tlan lai kan hmu” a ti.

KNLA ralkap in သောလယ်ထာ့ (မဲ့စန်လက်) ih SAC ralkap buuk cu tuhlan ihsin an rak kulh cia ṭhepṭhimi a si. Kan dung zarh lam khan ei-in tlasam harsa in an rak um zo ih cuvek dinhmun an si ruangah olsam ten SAC ralkap buuk an lak theimi a si.

Min Aung Hlaing hohami kawl ralkap in Myanmar kumpi cozah thuneihnak an la hnu February 1 ihsin thok, KNU in a ramsung ih um SAC ralkap buuk ṭhenkhat cu a hahaa teten a la vivo ih hmailam caan khalah a la vivo ding zum a um tiah ramkhel thiamsang pawl in an rel.

Leave a Reply

Your email address will not be published. Required fields are marked *