KNDF in timlamnak nei cia dingin Khuami pawl Ralrin an pe

Karenni Nationalities Defense Force le SAC ralhraang karlak boruak sosang deuh nak hmun kiangkap ih khuami pawl cu ziangtik lai khalah Inn le Lo suahsan ṭul dinhmun an thleng thei ruangah ei le in ding siseh ṭulhai poimawh siivai tiang ralring cia dingin KNDF in thuthannak an nei.

KNDF ih ṭuanvonei mipakhat cun “ziangtiklai khalah doawknak suak thei dinhmun kan thleng tikah mipi lam khalin timlamnak an nei cia ṭul thlang. Thuthang suak ngaihven in ralring cia dingin thuthannak kan nei duh a si. Abikin ei-in-ro pawl khawl cia seh la, cule Furpi a si tikah ruahkhamnak tipuan khal timlam cia seh la a ṭha ding. Sii le Vai khal lei cia seh la a sual lo ding. Kan boruak a sosang deuhdeuh, nasa zetih doawknak suak thei dinhmun ah kan um” tiah Irrawaddy hnen ah a sim.

Atufang Kayah ram boruak a sosang zetih August 3, nikhat sung lawngah Bawlakhe le Hpruso myone sungah KA le KNDF kopaw in SAC ralhraang thawn voi 4 rori an kapaw. Doawknak ruangih khua suahsantu mipum ting luan an um zo.

KNDF cu Kayah ramkulh myone dangdang ih mipi humhimtu PDF kawmkhawmmi ralkapbu an si ih hmuhtonnak tamzet neitu Karenni Army thawn kopaw in SAC ralhraang dorerotu an si.

Tuṭum ih tlangthannak an nei mi thu thawn pehpar in KNDF ih ṭuanvonei mipakhat cun “ei-in siivai pawl ralring cia dingin khuami pawl kan sim than nak san cu ralkian bawmawknak thawhmi le sumsaw a harsa tuk ruangah a si.”

“Cuvek a si tikah kan nih lam in ral do phah, khat lam ah ralkian pawl bawm phah dingin kan tlin lo. Curuangah ralkian in hramlak ih an beu tikah remcang thei dingin simthannak kan nei mi a si” a ti.

Kayah ramkulh ih SAC ralhraang dorerotu PKPF (ကရင်နီ ပြည်သူ့ အင် အားစု) khalin doawknak a natsat cun SAC ralhraang pawl in meisa, internet, phone line le Lamziin tvp an phit ding zum a um ruangah nitin ṭul hai mi siseh, thuamhnaw, sinfen, pakan bungbel, paisa, siivai, Power bank, ni 5 deih fangfai le ei-in ro pawl timlam cia dingin mipi hnen ah ralrin peknak ca an kuat tiah theih a si.

Leave a Reply

Your email address will not be published. Required fields are marked *