Khuate pakhat ih Tiliantuk cu an khua ṭhenhnih ah a phel

Meithal puak le bomb puak thawm thawn Myanmar rampi a buai vutvo lai ah Rakhine ramṭhen, Toungok myone, Pun Tin tikulh dunglambik ih um Amaw khuate cu May 26 ih tilain in ṭhenhnih ah a ti phel.

Innkhi 100 hrawng umnak Amaw ih khuadung le hmai pehawknak lamziin cu tilian in a ti ciim thluh ih fehnak ziin khal um nawn loin khuami pawl in harsa an tong.

Amaw khua kiang ih um mipakhat cun “atu`i laamziin ciimnak dunglam ah innkhi 30, mipum 100 hrawng an um. Cun khatlam ah thlanmual a um. Khatlamral nisuahnak lam ah Siikhaan le Tlawnginn pawl a um. Curuangah hilam ih um midamlo an um cun suksonak a remcang nawn lo. Tlawng an ong tik khalah Tlawngkainak ziin a um lo” a ti.

Tilain in feet 15 kau, feet 40 hrawng saumi tiva fate a suah ih Tilian caan ah Lawng hmangin le Titlak caan ah Ke thawn ciarbek lakin feh theihmi lamziin a si ih cangkap dawl thluh in ṭhazetih tuah theih a si hrih lo hman ah Lilawn tal don sak dingin khuami pawl cun an beisei.

“Hih khua cu Indian tipithuanthum, Bay Of Bengal kap ih um a si ih Tilian tikah tisuar vuak tuar thei zet nak hmun a si. Amaw tiva khal hi tuhlan kum 20 hrawng ahcun Bay Of Bengal thawn a hlat aw zet. Tisuar in tikap a vuak ciim vivo ih tu ahcun falong 2 hrawng lawng a hlat aw thlang”.

“Curuangah atui` ziin ciim khal hi tuah ṭhat a si hman ah caan rei a awh cuang lo ding. Tikulh kilkip dawl ṭhat lawlaw a ṭul” tiah Pun Tin tikulh ih um Ko Chit Kyaw in DMG hnen ah a sim.

Ziin ciim thu cu SAC ralhraang hnen ah an sim thei ih uktu lam cun penghuap ṭuanvo neitu hnen ah simtheinak an nei zo thu le tlun lam thusuak vekin hmanlaknak an nei tum vivo thu DMG hnen ah a sim.

Pun Tin cu Bay of Bengal tikaptluan ih um a si ih kauhlam 35 square miles, khua 12, Innkhi 1000 luan le mipum 5000 luan umnak tikhulh a si ih tilian ruangah kum tinten harsanak phunphun an tuar.

Leave a Reply

Your email address will not be published. Required fields are marked *