Khuabawi le VengLal pawl Thinhar Vansang Mangbang in an um

Thaketa myone, number 7 venglal U Thet Pine cu May 3 zaanlam nazi 3 hrawngah mikhual cazin report tuding hngakin a mah lawng zung ah a to.

Minute 15 hrawng rei hnu ah hmaikhuh bun mino 3 cu mawṭaw cycle thawn zung hmai ah an cawl ih mikhual cazin kan pe ding ti`n mipahnih zung ah an lut ih an rualpi pakhat cun innleng in a hngak hai.

Zung sung an lut hnu reilote ah hmanhmawh zetin an suak sal ih mawṭaw cycle thawn an tlan cih. Venglal Thet Pine khal innleng a ra suak ve cu namte dawtnak hriamhma thawn ataksa ah thisen a khat thluh.

Cumicu Frontier media hnen ah Vengsungum mipakhat in May 3 ih thil thleng a rel sal mi a siih “Venglal cu siizung an panpi cih nan zaanlam nazi 4 luan ah a thi” a ti.

Amahcun “Vengsung phungki tlawng ih CCTV an zoh sal tikah mino 3 an si ti cu an thei ciang nan zo an si? Khawilam in an ra tikhal zohman in an thei lo” a ti.

Venglal U Thet Pine cu rampi buai hnu, SAC ralhraang lamṭang venglal that tuar hmasabik lam a si ih, cuhnu in rampihuap hmun tamzet ah khuabawi, venglal le SAC ralhraang lam ṭang mitamzet cu a khaatkhaat in that an tuar vivo.

Ṭhenkhat an si le zung urkang sak, Khuabawi, Venglal inn kiangah bomb puah, cerek fun telin ralrinpeknak ca kuat … tvk in a phunphun in hrem an tuar.

June 2 khalah Sagaing ramṭhen, Taze (တန့်ဆည်) myone ih venglal U Ye Htun cu
vengsung mipi le CDM tuahtu pawl ih dilngennak ngaipoimawh loin Lailak Tlawng ong dingih a feh lai ah an kap that.

Cuvek dinhmun a si tikah rampumhuap Khuabawi le Venglal ṭhenkhat cun thih ṭih in hnaṭuan an ban san.

Miṭhen an si le zung kai nakah security thawn tiṭhepṭhep in an um nan ziangtikah mipi kut ka tuar ding ti ruat phah in thinhar vansang in an um.

Venglal U Thet Pine that tuar thu thawn pehpar in khuami pakhat cun “Aiawhtu venglal thar an ret awmang khal kan thei lo. Mikhual cazin report dingih ka va feh cu zung an ong nan sangka hmai ah thirhling thawn an kham. Asung khalah in lutter duh lo. Zungsung in mipakhat a ra suak ih form fillup ding in pe. An zaten thiphang hmel an pu”.

“Tuhlan ahcun thla khat viokhat lawng mikhual cazin report dingin kan dil nan an duh hrimhrim lo. Asinan, tu ahcun dilṭul loin thlakhat voikhat lawng report uh in ti. Thinphang hmuihmel thawn an um ringring cu zung feh tapiang cu an hnih suak thluh. Keimah khal awsuak ih hni lo dingin ka supaw thei fangfang” a ti. (FrontierMyanmar)

Leave a Reply

Your email address will not be published. Required fields are marked *