Khawpi sungih raldo danding zir rero zotu Gen Z

SAC ralkap do let dingin Gen-Z mitamzet cu Myanmar ramri hmun him pakhat ah May 8 ihsin raldo zirnak an nei thok tiah theih a si.

Raldo zirhtu cu Mandalay ramṭhen, Meiktila hrambun tatmah 99 ih ralbawi rak ṭuan dah CDM luttu Major Hein Thaw Oo a si ih ralkap sung thu theitu a si tikah amah kaihhruainak thawn raldo an zir cu mino pawl in an hlawkpi zetding tiah ruah a si.

Major Hein Thaw Oo cun “raldo zirnak ah thleidanawk a theih lo. Daan le Duun thlun in felfai zetih zirhawk a ṭul. Cun, hruaitu lam khalah hruaitu ka si tiih uangawk a theih lo. Kan zaten raldo tlang thluh ding kan si ruangah lungrualten Ke kan kar tlang vivo a ṭul.”

“Cun, raldo lawng siloin siivai thawn pehparin harhdamnak lam khal siseh, ramleng lam thawn pehtlaihawk dan, mirang ca, Computer le ceet thilri thawn pehparmi le kutthiamnak dangdang khal kan zirhaw vivo ding” a ti.

Raldo zirtuding cu kum 20-35 karlak mino an tam ih an virvat a ṭha hlei ah SAC ralkap hnakih mifim hlir an si tiah Major Hein Thaw Oo in a ti.

Amahcun “A leng ih kan zirh pangai ahcun thla 3 a si ih hinah ahcun thla 1 ah kan zir thei ding. An thluak a ṭhatuk tikah zirhawkdan a nuam ih hmasawn a ol zet. Kan hnakih mifim khal an tam ih kan ruah ban lo cin khal rak ruat bantu an um. Zamrang patawp ih zirhaw ding cun thla 1 hrawng a si ding. Kan zir rei thei a si le a ṭha sinsin ih kan thazang khal a cak sinsin ding” a ti.

Mipi lam ṭangin CDM telvetu ခမရ 528 ih ralbawi Lin Htet Aung khal mino raldo zirhtuding a siih khuapi laak tikih raldo dan ding thupibikah retin zirh an ṭul ding a ti.

Ralbawi Lin Htet Aung cun “GenZ raldo kan zirh ih ralkapsuak mipi lam ṭang thar tamsawn cun cangtheitawk le titheitawk in an zirh cio hai. Abikin SAC ralkap do tikih khuasung raldodan hi pakhatnak ah retin zirh ka duh. SAC ralkap pawl cu hramlak raldo an thiam. Kanmah in kan do ding cun khuasung raldodan thawn pehpar in tamzet kan zirh ṭul”.

“Mino tamzet cu tumtah lungputpi nei an si nan raldo thu ah an tlasam deuh. Aleng ahcun raldo kan zirh hi thla 4 hrawng a si. Atucu ralkapbu din dingmi hrang hmanhmawh in kan zirh tikah tikcucaan a mal men thei. Asinan, mino pawl cun an mah thei tawk ten an zuam rero. Khuasung um tlawng kai lai an si thawn thufehdan an theithiam ol ih ramduhdawtnak lungput an neimi in a betbet tikah hmasawn a ol zet. Raldo le raldo zir hi lungput thawn khal a pehtlaihmi a si. Curuangah thinlung takten kan zirin kan teima a si cun a rei hlan ah nehnak kan co cih ding. Cun mino pawl khal thapan ten an zir rero tiah ka thei. An hlawh tling ko ding” a ti.

Major Hein Thaw Oo tei` raldo zirhnak hi khawi hmun a si ih zoi kaihhruaimi tang ah an zir, ziangtiktiang an zir dingih zoi pawlkom thawn an kop ding tivek an rel tel lo.

Asinan, Major Hein Thaw Oo cun ralkap ukhruainak dotu hriamhreikeng ralkapbu thawn kopaw ding an si thu le pawlkom ṭhenkhat thawn biakawknak an nei zo thu a rel a si.

National Unity Government khalin Federal ralkapbu din thei dingin tlangpar hriamhreikeng pawlkom ṭhenkhat thawn an beaw zo/rerolai ih cumi dinsuakthei dingin hmainor ziinsialtu ah Federal hmuicuang ralkapbu “People Defence Force” cu May 5 ah dinsuak a si thu an phuang zo a si. (Myanmar Now, RFA)

Leave a Reply

Your email address will not be published. Required fields are marked *