Kawl Ralkap le Palik Pawl cun Lo feh hnaṭuan lai khal an Hlah nawn lo

Kawl ralkap le palik pawl cu a ninii in an cetcangdan a luar vivo ih lamzawh duhphorhnak ih tello, Lo lam ihsi ra tlung men pawl khal hlah loin an kai hlei ah nikhua theilo ding khawp tiang kut an thlak.

Mandalay ramṭhen, Sintgaing Myo, Ṭawma khua ih mino 5 cu thuhla zianghman sutnak um hran lo in an nu le pa hmai rori ah ralkap le palik in thizik in an thawi ih hlei ah an kai cih.

Mino 5 an vuak thawi nak cu Tlawnginn hmai ah a si ih Tlawnginn ih umhmun khuar ralkap duh lo ah khuami pawl cun Tlawnginn hmai ah tohnawh duhphorhnak an nei ṭheu.

March 10 ih tohnawh duhphorhnak neitumtu khawmi pawl cu rinlopin palik le ralkap in an kai tum ih an tlanhlo thluh ruangah Lo ihsi ratlung miṭhenkhat le datsi leitum mipakhat riangri an kai.

Lo lam ihsi tlung pawl cu kuah-Li keng case in an kai ih, inn ih hman ding datsi leitu mipakhat cu khualak ih datsi keng case in an kai. Cuihtlunah kaihkhih lawng duhtawk loin cuih mi 5 pawl cu an nu le pa hmuhhngan rori ah thizik in an thawi ih vuakthawi tuarlo ah nikhua theilo in a hmun ih tlutawp khal an um.

Kaihkhih tuar mi 5 pawl cu phun 9 kai lai Myint Myat Kyaw, Aung Kyaw Thu (kum 18), Ko Hlah Moo (kum 30), Nan Win (kum 24) le kum 28 mi Aung Khine Soe pawl an si.

Kaihkhih tuar mipakhat ih Nu cun “kan fa le kut an thlak lai cu a thupten kan bih ih an kai lai khal kan hmu” ti`n ṭap phah in a sim. (DVB)

Leave a Reply

Your email address will not be published. Required fields are marked *