Kawl ralkap in Wikipedia an phit ih Facebook in ralkap pawl i account a phit sak ve

Myanmar ralkap cozah thar in a ramsung ah Wikipedia hman theih nawnlo dingin a phit hnu zarhkhat kim hlan ah Facebook in Myanmar ralkap thawn pehparnak a nei mi Facebook account hmuahhmuah a phit thluh zo thu February 25 ah a phuang ve.

Ramtinkim thuanthu siseh, Leitlun huap mihminthang thuanthu, Leitlun san thuanthu ih hminsintlak nisunglawi thuanthu tivek… minung theih ṭulmi thil cikim ngamkhum ṭhehnak Wikipedia (encyclopedia) website cu (ṭong ci 285 i let salmi telin) Myanmar ralkap in a ramsung ah hman theihlo dingin a phit thluh zo tiah Internet traffic monitoring service NetBlocks in February 19 ah a tarlang.

Ralkap in wikipedia an phit nak san hi theihcian a si lo nan China vekin ramsung Internet humreekawnak tawhram a ṭan thoknak a langtermi a si tiah ramkhel thiamsang ramleng mithiam pawl in an sim.

Kawl ralkap cozah thar in Internet thawn pehparmi daan thar a tawlrel rero lai ah Facebook lam khalin ralkap thiltuah diklo cu a hmusuak vivo ih a platform sung ih ralkap thawn pehpar awmi thil hmuahhmuah cu hnawng tumin hmalaknak a nei ve rero.

Ralkap in Myanmar kumpi cozah thuneihnak a la hnu February 1 zing ihsin thok, Kawl ralkap thawn pehparmi FB cahmai tamzet cu Facebook in a hlon zoih ralkap kut hnuai ih ummi company pawl ih thehlarnak pawl khal a hlonhlo hlei ah a thar dilnak khal a cohlang duh nawn lo.

Facebook in hitiih hmalaknak a nei nak san cu Kawl ralkap in mihring pianvo a pahbal tiah a ruat ruangah le ralkap in thudiklo, an mai duhdan zawng hlir in thuthang diklo a thlah ṭheu ruangah a si tiah CBS media in a tarlang.

Leave a Reply

Your email address will not be published. Required fields are marked *