Kalaymyo ah Ralkap le Palik an cangvai nasa ih Lamziinpi rori khalah mi paisa an long

SAC ralkap in minung 30 hrawng an kap that zo nak Sagaing ramṭhen, Kalaymyo ah nitin deuh thaw in mipi lam in lamzawh duhphorhnak an nei thotho ih palik le ralkap lam khalin April 14 hrawng khan thazaang tamzet hmangin khuasung ziin kerkawm tiang an duty.

Ziinpi ziin kerkawm ih motor, motor cycle vak sukso pawl khal cawl ter in ralkap le palik in an check thluh.

Khuasung um mipakhat cun “Hmun tinkim deuh thaw ah an um. Hmun kerkawm khalah thupthiar in an duty ih kan dung KCA thawn an kapaw hnu a thaisun ah kahawknak kiang Sanmyo veng ah innkhat hnu innkhat lutsuak in an check vivo. Khualeng lam khal an check ih netahnu cun khuasung hmuntinkim deuh thaw ah vak in an check vivo” a ti.

Kandung KCA thawn an kahawknak kiangkap veng pawl ah meithal hriamhrei hawlin innkhat hnu innkhat an lut vivo ih thusutnak khal an nei phah vivo.

Duh tikih meithal kap puak hluahhlo ralkap le palik pawl cutiih an cangvai nasatuk cu Kalaymyo mipi an thla phang zet. Poimawh ṭul hai lengsuak ding khal an hreh phah thluh.

Hminthup Kalaymyo ih um nupinu pakhat cun “Ṭulhai lei dingih leng kan suak tik khalah paisa mallai khal ken a hreh um. Mizaansun lam khalah ziinpi ih nunau pakhat an check ih a motor cycle toolbox khal an ongter. Bazar kainakding kyat thawng 20 a keng mi cu ralkap le palik duty pawl in an lak sak. Lak lo dingin ṭap phah in a dil rero nan ziangah an siar lo” a ti.

Ralkap le palik pawl cu zaan khalah motor thawn duty an vak ih meithal, kuah-Li, ziinan thunmi puakkuai thei palang, kut ih tuahcawp gas meith tvp an kut ih ap thluh dingin nitin deuh thaw tlangthannak an nei tiah Kalaymyo ih um pawl in an sim.

Hitiih SAC ralkap le palik an cangvai nasatuk ruangah Tahan ih mipi tamzet cun Inn le Lo suahsan in hmunhim ah beunak an hawl. Khuasung um pawl ih simvek a si le ralkap le palik ṭih ah Tahan suahsantu mipum thawng 10 hrawng an um ding ti a si.

Kalaymyo suahsan in hmundang sungkhat unau hnen ih tlan pawl le hramlak, ramleng lam ih himnak hawl tamsawn cu sungkurun ih tlan an si tiah theih a si ih khuami pakhat cun “Dawr ong tivek khal an um nawn lo. Inn ruak tawhkalhmi a tam ih sungkurun ih tlan an tam. Tahan lam khal siseh kan dung ih SAC ralkap le KCA kapawnak Hmunlai lam khal Inn le Lo tlansan an tam. Atufang kan dinhmun umdan simtheih a si lo ruangah mitazet cu an ra kir hrih lo” a ti.

Cuti cingin Kalaymyo ih mipi umsun cun ralkap le palik duty pawl hrial phah in lamzawhnak nitin deuh thaw an nei.

Lamzawhnak ih hruaitu mipakhat cun “Mipi ṭhenṭheknak cu a um ṭheu nak lamzawhnak cu cawl kan tum lo. Atucu NUG cozah thar le an din zo tikah thacak zetih hmainor a ṭul fawn” a ti.

Kalaymyo ah ralkap ukhruainak dodaltu mipi le SAC ralkap/palik cu March 28 in an kap aw thok ih tuini tiangah mipi lam in mithi 30 hrawng an um. Lamzawh duhphorhnak thawn pehpar ih kaihkhih tuar cu minung 18 hrawng an um tiah Kalaymyo ih um pawl in an sim. (RFA)

Leave a Reply

Your email address will not be published. Required fields are marked *