Kalaymyo : Natchaung kiang ih Doawknak ah Ralkap 6 thi in Mipi lam 1 nunnak liam

March 31 thlacem ni ah Sagaing ramṭhen,Kalay myone, Natchuang khua in 5 falung hrawng hlatnak ah ralkap le mipi an kapaw ih hriamhrei hmanrua thlauaw zet cingin mipi lam in ralkap 6 an kap that tiah Mizzima thuthang in a phuang.

Ralkap cetcangdan tuar thei nawn loin Kalaymyo mipi cun March 28 ah hriamhrei neihsun hmuahhmuah phorh in ralkap pawl an do thok.

Cuih ni ah Chinmi miralṭha 3 kan sung ih ralkap lam khal amalbik 4 an thi tiah a hmutu pawl in an sim.

Kalay sehvel ih khuami pawl khalin hriamhrei an neihsun hmuahhmuah suah in le a fim zawng in (ralkap motor kham dingin thingkung an hau tluk) ralkap an rak do ve ih March 29 le 30 ni ah Kalay-Gangaw ziin ah ralkap le mipi an kapaw.

Cutin, March 28 ihsin thok Kalay sehvel ah nitin kapawknak a um ih thlacem ni March 31 ih ralkap le mipi kapaw cu suun nazi 1 in zaanlam nazi 7 hrawng tiang a siih nasazetin nazi 6 kimzik an kapaw.

Cumi ah ralkap lam cun santhar meithal cangkang hmangin nasa zetin an kap nan mipi lam in kum 18 mi Mg Khine Zaw Win a nunnak a liam ih ralkap lam cu mi 6 rori an thi tiah Mizzima thuthang in a phuang a si.