Kalaymyo Kahawknak ih Mithi an tamtuk nak San

SAC ralkap pawl in Tahan ralkham buuk an siim hlan ah ni mallai tiimlaamnak an rak nei cia. Tahan ralkham buuk nisuahnak lam falung 1 hlat hrawngah hmai nor in umhmun an rak khuar cia. Peng 4 hlat hrawng ih um mi nitlaknak lam Kalay university khalah ralkap pawl cun ṭan an rak la cia.

SAC ralkap in Tahan ralkham buuk an kap ding ti cu nikhat duh hrawng ah thuthang a leng zo. Mipi lam khal ralring zetin an rak man cia ih zaan var deuh thaw an duty tiah a hmun ih umtu pawl in an rel. Nan, zing khawvang zik hrawng tiang cangvaihnak zianghman a um lo ruangah an ra tum lo ti`n an cawl hahdam lai takah SAC ralkap le palik cun an kap thok.

Tahan ralkham buuk cu vutnel dip thawn kham mi a siih Kalay Civil Army pawl cun ralram ih ralkham buuk taktak vekih an ringmi a si.

Unau hmelpalh hrawngah SAC ralkap in Tahan ralkham buuk an kap thok

Zinglam nazi 5 hrawngah SAC ralkap cun bomb thawn viothum an kap hmaisa tiah Tahan khuami pawl in an sim.

Ahmun ih umvetu mipakhat cun “RPG hnakih hmual na sawn mi bomb an hmang ti`n bomb lam thiamsang pawl in an sim. Voithum an kap ih voihnihnak an kap mi in ralkham vutneel dip a puah darh thluh. Voithumnak an kap mi cun mipi in tham thok” a ti.

Ralkham buuk cu Tahan luhnak ralkham buuk le HmunLai ralkham buuk ti`n pahnih a um. SAC ralkap cun a pahnih rori`n dunghmai cep in an do, an kap.

Tahan ralkham buuk thawn pengkhat hrawng hlat nak, Naypidaw veng le Taungzalat karlak laamziin par khalah ralkham buuk pakhat an sak. Cumicu Taungtha khua thawn neih zetih ummi a si ruangah Taungtha ralkham buuk tiah an ko.

Cumicu Tahan ralkham buuk thawn a hlat aw tuk ti an thei ruangah SAC ralkap cun falung 3 hrawng hlatnak အထက 2 tlawng ihsin an luttlang. Cutikah Taungtha le Tahan ralkham buuk cu an kopaw thei nawn lo.

Boruak rak thlirtu mipakhat cun “kopaw theilo mi le pehzomawnak an nei thei lo mi hi tlasamnak pakhat a si” tiah a sim.

KCA lam in tuarfei zetin caan rei zet an humkham aw

SAC ralkap cun sniper, meithal tum le bomb tivek hmangin an kap nan KAC lam cun an neih sun Lai meithal, gas meithal, tuahlokmi meithal tive thawn lawng an do thei tikah an ralthuam hriamhrei hmangmi a thlau aw tuk. Cutin caan rei deuh an kapaw tikah zinglam nazi 7 hrawng cun mipi lam ah mithi an um thok.

“Kan hmanmi ralthuam a thlauaw tikah caan rei zet do ding kan si lo ti cu kan thei ko. Kan cangvai tum dan, a fim zawng ih do ding kan timi cu reizet rak kap ve si lo in a hrial dan hawl dingin kan sim aw cia. Asinan, kan mino pawl puakkuai in an supaw theilo cu thihcilh in kan do ding tivekah a suak thluh. Himihi, poi kan ti zet” tiah mino hotu mipakhat in a sim.

Zinglam nazi 8 ahcun mipi lam ah mithi 3 an um zo. Culaiah hruaitu pakhat cu a kut ah nasa zetin hliamhma a tuar. Athi pit theilo cu zaanlam ah a nunnak a cem phah. Tahan ralkham buuk kahnakih nunnak liam hmaisabik cu အောင်သစ္စာ veng ih um Paralṭha Salai Tluang Tin Lian A.K.A ကိုအာကာ a si.

Nazi 8 hrawng ahcun SAC ralkap in dunghmai cepin ralkham buuk an la suak. Mino pawl cu mah le mah humaw phah in hmun dangdang ah an ṭhen ṭhek aw thluh. Ralkap lam cun veng sung lam tiang nor vivo meithal an kap ciamco. Nazi 9 hrawng ahcun mipi lam mi 5 an thi zo.

Nisuahnak lam, Nitlaknak lam le Thlanglam pawl in ralkap in an kulh thluh ruangah mino pawl cu Saklam pan in an tlan thok. Cuveten ralkap cun motor thawn Saklam ihsin an rak boh thok lala. (Hi ciah ah mipi lam ah mizuar thlai hmang an um ti cu a ciang)

Thihcilh in ralkham buuk an hum lawlaw

“Ralkham buuk ah hngetkhoh zetin umhmun an khuar cu a siimtu hrangah timlamnak caanṭha an nei. Dung le hmai lam in ralkap in nor an tum mi cu theih cia a si nan ralkham buuk ih umhmun an khuar hngettuk cu theihcing rori`n ralkap ih ciilnuai an tuar” tiah SAC ralkap le KCA kahawkdan rak thlirtu HtunHtun in a sim.

Nazi 10 hrawng ahcun SAC ralkap pawl cu ziinkiil tintian ah ṭanhmun an lak ih a cang mi thil hmuahhmuah cu an kap thluh. Mihring phenthlam khal an kap. Kah ding a um lo khalle mipi ṭhih hrim in van par ah meithal an kap ciamco.

Nazi 12 hrawng ahcun inn ih ummen vokrawl pek lai mipakhat an kap that. Cumi hlan khalah Wesley Siizung ih zaan duty tlunglam mipakhat an kap that.

Netabik ahcun mino hruaitu Ko Zaw le Salai Tluang Tin Lian telin miruak 10 an la suak thei. Nemhngetmi mithi cu 12 an si.

Lungruallo hi sambaunak pakhat a si

Mipi lam kan tuar nasatuk mi cu lungruallonak ruangah khal a si thei tiah HtunHtun in a zumnak a rel.

Kan dung baite ah khan mipi lam in palik 7 an kai. Cupawl cu kaihkhih tuar mino hruaitu pawl thawn mipum thlengaw dingin ralkap lam in dilngennak an nei. Cumi ah kaphnih lungkimnak thawn palik 7 cu thlah zalen an si nan SAC ralkap cun mino hruaitu an thlah cuanglo.

Kaphnih lungkimnak ahcun kaihkhih tuar mino hruaitu thawn mipum thlengaw ding ti a si nan SAC ralkap cun mi menmen 9 an rak thlah zalen. Cupawlcu mino hruaitu thawn tahṭhim ahcun mipi hrang ih ṭangkai tuklo an si. Zaan duty nakih kaihkhih tuar tivek an si ih SAC ralkap le mino hruaitu ṭhenkhat rak dawr aw lo hman sehla an thlah zalen tum cia mi an si thei tiah mipakhat cun a sim.

Cumi thu ah mipi lam ah hmuaw thiam lonak a um ih mino hruaitu ṭhenkhat cu mawh an puh, rihhlehtu khal an um. Cutin mipi (Kalay Civil Army) lakah lungrual lonak a um thok ih hmailam cangvaihnak hrang suangtuahnak an nei mi khal lungkim tlangnak um mumal loin thuthluknak an tuah tiah boruak rak thlirtu Maung Kyi le Htun Htun in an rel.

Khaikhawmnak

Thu umdan a tawi zawngin kan zoh a si le Kalaymyo kahawknak ih mipi kan tuar tuk nak cu thu rual lo, kan lak ih ralkap lam ṭang an um ruangah, ralthuam thlauawtuk, Pawlkom zawng ih hruaitu/bawmtu/khuakhangtu sanbaunak ruangah a si kan ti thei.

Kalaymyo kahawknak ih an tifuh zetmi pakhat cu mipi ṭhenṭhekaw tikih relhnak ding an tawlrel ciami hi a si. April 7 zing ah SAC ralkap in Tahan ralkham buuk an siim hnu nazi 10 hrawng ahcun relhnakding tawlrel cia mi hmun pawl ah mitamzet an rak beu man. Culosehla SAC ralkap in mino kaihkhihmi an nei tam zet ding a si.

April 7 ih Kalaymyo kahawknak ah mipi lam in mithi 12 an um ih kaihkhih tuar minung 20 hrawng an um tiah theih a si. (BBC + Opinion)

Leave a Reply

Your email address will not be published. Required fields are marked *